1653/2022-2023
Aizawl 18th August 2022: Nimin ni 17.8.2022 (Nilaini) khan Vanapa Hall, Aizawl-ah District Institute of Education and Training (DIET) Aizawl buatsaih lawmthu sawina leh zirlai tițhate chawimawina hun hman a ni a. School Education Minister Pu Lalchhandama Ralte chuan khuallian niin a hmanpui.

Khuallian School Education Minister chuan thusawiin DIET ațanga zir chhuakte chu an thawh hunah an kutchhuak ațanga an hlutna a par chhuah theih nan țan la tur leh  trained chhuak te chu an danglamna lantir turin a chah.

Minister Pu Lalchhandama Ralte chuan DIET ațanga zir chhuakte chu an thiamna leh finna te Lalpa tan hmang a, missionary rilru pu turte, zirtir hna chu Pathian hna pawimawh a ni tih hre turin a chah bawk. Minister chuan hnam thinlung pu a, Mizo hnam nihphung zahpui lova chawisang zawk turin a chah a, mahni ram changkansan chu hlawhtlinna a awm ngai lo a ni a ti.

Dr Lalzirmawia Chhangte, Secretary, School Education pawhin thusawiin Supreme Court rulling leh RTE ten zirtirna hna thawk turin trained ngei a phut a, DIET zir chhuak te chu zirtirtu hna dil thei leh lak theih an lo ni ta a ni a ti a. An profession-ah intuai thar zel turin a chah a, an quality chu a hun leh hmunah lan chhuahtir fo turin a sawm a ni.

Pi Laldawngliani Chawngthu, Director, SCERT pawhin thusawiin DIET Aizawl leh Lunglei te chu India ramah B.Ed zir theihna awm chhun an ni a ti a. Zirlaite chu huaisenna, hriatna leh thiamna nei turte, midangte aia a țha zawnga danglam nih hlau lo turte, naupangte remhriatna leh thiamna hai chhuak chhuak thiam tur te, taimakna leh inpekna nei turin a chah bawk.

DIET Aizawl hian kumin B.Ed result chhuakah khan top tenah 7 an nei a, Lalțanpuii zadeng chu Gold medalist a ni. D.El.Ed-ah top ten mi 4 an nei bawk. Aizawl DIET hi kum 1952-ah din a ni a, kumin hi kum 70-na a ni. Kum 2000 khan DIET ah hlan kai a ni a, kum 2018 ah B.Ed zirnaah hlankai a ni. Tunah hian D.El.Ed zirlai 240, B.Ed zirlai 100 an nei a, faculty 41 an nei bawk.

Nimina lawmthu sawi leh zirlai tițhate chawimawina Vanapa Hall-a neihah hian khuallian leh khualzahawm te bakah Director SCERT Pi Laldawngliani Chawngthu, MBSE chairman Pu JH Zoremthanga te, DIET Principal leh faculty te, zirlaite an kalkhawm a ni.