1654/2022-2023
Aizawl 18th August 2022: Vawiin khan Chanmari YMA Hall Aizawl-ah Samagra Shiksha Mizoram leh Cricket Association of Mizoram te thawhdunna Grassroot Cricket School bul țanna Hit- off Programme neih a ni a, School Education Minister Pu Lalchhandama Ralte chuan khuallian niin a hmanpui a. Sports & Youth Services Minister Pu Robert Romawia Royte pawhin khualzahawm niin a hmanpui bawk.  

School Education Minister Pu Lalchhandama Ralte chuan he hunah hian thusawiin Mizote taksa pian phung nena inmil tak, eizawnna tling, Cricket zirna sikula kan nei thei chu a lawmawm a, ke kan pen dik hle nia a lan thu a sawi.

School Education Minister chuan kuminah CAM nen sikul 10-ah thawhho a ni a, nakumah chuan sikul 50 ah thawhho leh a ni dawn a, tun ațanga kum 10 a kal meuh chuan Mizo țhalaiten eizawnna tling thiamna neiin national player-ah te pawh an awm nual theih a beisei thu a sawi. Cricket bul țanna atana thlan sikul 10 te chu a hmahruaitu an nih avangin inpe tak leh taima taka zir turin a chah a, zirtirtute pawh sikul vannei an ni tih hriaa țan la turin a fuih bawk.

Minister chuan CAM leh Samagra Shiksha an thawk dun thei chu kawng hrang hrangin a tu lam ve ve tan pawh a vanneihthlak tih sawiin sikula cricket zir a lo ni ta chu cricket-in a kawng zawh tur dik tak a zawh a ni a ti a. Cricket zir naupangte chu insum a, tei rei peihna nei turin a fuih a, Zoram chu Cricket-ah khawvel hriata pho chhuah a nih theih nan Hit Off a ni tih a sawi.

Sports & Youth Services Minister Pu Robert Romawia Royte pawhin thusawiin Samagra Shiksha leh Cricket Association of Mizoram (CAM) ten thawhhona an nei thei chu lawmawm a tih thu a sawi a, NEP 2020 pawhin sports hi a ngai pawimawh hle a, ram changkangah te chuan school ah sports an ngai pawimawh hle a ni a ti a. Cricket hlutzia sawiin sports ah chuan sum leh paia innghahna nei țha, inrelbawlna fel tak nei, CAM pawh sorkar țanpui ngai lo intodelh tak an ni a, sum leh pai thawh chhuahna țha an tling a ni a ti a, hetianga belh tlak Cricket zirna school ah neih a ni thei chu lawmawm a tih thu a sawi.

Pu Lalhmachhuana, SPD Samagra Shiksha chuan report a pe bawk. Samagra Shiksha Mizoram leh Cricket Association of Mizoram te chuan thawhhona thuthlung (MoU) chu ni April 12, 2022-ah an ziak a, he thawhhona thuthlung hi kum 5 chhung daih tur a ziah a ni.

Aizawl khawpui chhunga sawrkar elementary School 10-ah Grassroots Cricket School tiin bul tan a ni a, School tinah zirlai mipa 40 leh hmeichhia 10 zel an awm. Kum thar atangin District dangah pawh kalpui zel tum a ni. Sikul zirlai tibuai lo turin kar khatah vawi hnih emaw vawi thum emaw training an nei thin ang. Sum leh pai senso ngai zawng zawng leh Cricket thuam thil leh training-na atana mamawh zawng zawng Cricket Association of Mizoram ten an tum a, a bak tul dang zawng chu Samagra Shiksha, Mizoram-in a tum thung.

Naupang talent nei tha zual te kum tin National Cricket Academy Bangalore-a training an neih dan tur kawng zawn a ni ang a, Mizoram pawnah exposure trip neihtir thin an ni bawk ang.

Grassroots Cricket School ah hian Qualified coach dah vek an nih bakah, School tinah School Coordinator ruat an ni bawk.

Grassroots Cricket School a zir chhuak te hi Cricket Association of Mizoram ten Mizoram aiawha National Age Level Tournament hrang hrangah player zawnna hmun pakhat atan a hmang dawn a ni.

Vawiin Grassroot School Hit Off hi Dr Lalzirmawia Chhangte School Education Secretary chuan a kaihruai a, cricket khelhna hmanrua Kit sem nghal a ni. Hit Off Programme-ah hian Samagra shiksha officer-te, Cricket Association of Mizoram hruaitute, thawhdunna school 10 thlan chhuah zirtirtute leh zirlaite an tel a ni.