No.1789/2020-2021
Tukin khan Covid-19 beihletna kawnga Nodal Officer hrang hrang Pu Lalnunfela Chawngthu, SDO Sadar, Pu RL Thianghlima, DIET Principal & Procurement Officer, Pu Laldingliana Hrahsel, EE, I&WRD & Nodal Officer District Quarantine Facilities leh Dr.Lallawmkima, DIPRO Champhai te chuan tunhnaia Quarantine Centre tura ruat thar DIET Zotlang leh mamawh thulha hman theih tura rilruk KV School sak thar Dinthar Veng a mi te chu tlawhin an enfiah a ni. KV School tlawhnaah hian Official-te hi Pu Mahendra Prasad, Principal leh Contractor te’n an tawiawm a ni.
Vawiin khan Delhi atanga Thlawhtheihna hmanga lo haw mi pariat zinga pasarih (Mipa 4 leh Hmeichhia 3) te chu DIET Zotlang Quarantine Centre-ah hian dahluh niin, pakhat (Hmeichhia) hi Home Quarantine a ni a. Guwahati atang lo haw mi 2 (Mipa 1 leh Hmeichhia 1) vawiina lo thlengte pawh DIET Zotlang Quarantine Centre-ah hian daluh nghal an ni bawk.
Tukin Covid-19 sample endikna result chhuakah khan Champhai district atangin Covid-19 positive panga hmuhchhuah an ni a. Mipa 3 leh Hmeichhia 2 tunhnaia Delhi atanga lo haw an ni. Stramik Special Train hmanga May Ni 31 a Bairabi lo thleng, hemi hnua Bus hmanga June Ni 1 a Champhai lo thlenga Tlangsam Polytechnic Institutional Quarantine Centre-a dahluh an ni a. Tunah hian Designated Covid Health Centre (DCHC), Nursing School Building, Champhai-ah dahluh fel an ni tawh a. An vai hian Covid-19 natna langchhuaklo Asymptomatic niin, an dinhmun a tha a. Covid-19 Treatment Team, District Hospital Champhai ten uluk takin an vil reng a ni. Mipui tan thlaphanna leh chiaina tur a awm lo a ni.
Hetih mek lai hian Tamil Nadu atanga lo haw mi 69, Tlangsam Polytechnic Quarantine Centre a awm mi 66 leh DPRC Keifangtlanga awm mi 3, Quarantine Centre awm hun chhung Ni 14 hmang zoa May Ni 30, 2020 a chhuakte chinchang pawh district thuneitu ten an ngaihven chhunzawm zel a ni.
