No.1788/2020-2021

8th June, 2020: Vawiin khan Agriculture, Irrigation and Water Resources (I&WR) leh Cooperation changtu Minister Pu C. Lalrinsanga chuan Aizawl South-III Assembly Constituency chhunga Agriculture hmalakna hrang hrang enpuiin Lâu, Lik, Sailamzawl leh a chhehvel Zâu te a hmunah a tlawh.

Minister Pu C Lalrinsanga chuan thu sawiin, "Theihtawpa invenna kan kalpui mek chungin Covid-19 hripui chuan a takin Zoram min chenchilh ta a. Kan dan rual loh mah ni se theihtawpa kan tan tlan chuan Pathian khawngaihna zarah hnehna kan chang ngei ang. Chutihrualin hri kaite lo thinhrik emaw, lo pawng hlauh chiam a tul ber lo,” a ti. Hripui hian khawvel economy a sawi chhe nasa hle a, ram changkang leh hausate te pawhin nasa takin an tuar a, hetiang dinhmuna kan din lai hian keini pawh hian engnge kan tih theih tih hi kan ngaihtuah a ngai a ni, a ti a. Mamawh tih tlem a, buh leh bal tharchhuah kawngah beihpui kan thlak a ngai a ni, ti a loneitute fuihin tun dinhmunah chuan kan mamawh hi sum leh pai leh ro thil dang ni lovin 'ei tur' a ni ber a; buh thar tam hi kan thupui ber a ni, tih sawiin Agriculture Minister chuan tun huna hlu berte chu loneitute an ni, a ti.

Pu C.Lalrinsanga chuan Farm Mechanisation lama hmalakna kal mek leh nasa zawka hma lak a nih mek dan te loneitute hmaah a sawi a. Chief Minister Pu Zoramthanga pawhin lo neih lama kan mamawh hmanhmawhthlak zual te ngai pawimawhin tunah hian a hovin ruahmanna thar pawh siam mek a ni, a ti bawk.

An hmalakna leh harsatna tawhte a hmun ngeia enpui thin Minister an neih avangin loneitute chuan lawmthu an sawi a. Harsatna leh mamawh an neihte Minister hnenah hian an thlen a ni.

Sialsuk leh Sailam ram chhunga Lau, Lik leh Sailamzawlah te WRC leh thlai dang te chingin farmer-ten hma an la nasa hle a. Sialsuk ram chhungah ringawt pawh hian Hectare 120 vel leilet siam tawh a ni a. Hei bakah hian hectare 60 chuang leilet siam tur a la awm bawk a ni.

Agriculture Minister hi Pu H.Biakzaua, MLA (Vice Chairman, Agriculture Development Board) leh Aizawl South-III bialtu MLA Dr.F. Lalnunmawia te bakah I&WR Chief Engineer Er. Lalrotluanga leh Pu Rohmingthanga Colney Director, Agriculture (Crop Husbandary) ten an tawiawm a ni.