No.1787/2020-2021

Tarpho Branch YMA chuan vawiin khan Hnahthial District chhung Quarantine Centre-a awmte ei leh In tur thlai chi hrang hrang leh Covid 19 do kawnga hmalakna atan Rs.7000/- (Cheng Sang sarih) Hnahthial District Task Force-ah an hlan.

Heng tanpuina sum leh thlaite hi Hnahthial District Task Force Chairman leh District Bawrhsap ni bawk Pu Vanlalmawia chuan a chenna Bungalow-ah dawngin "Covid 19 avangin ramin harsatna leh manganna kan tawh chhoh mekah Kohhran leh NGO hrang hrang ten sorkar tanpui duhna rilru puin a taka an rawn pen chhuak thin hi a lawmawmin a thlamuan thlak hle a, sorkar thuchhuakte zawmin i tang tlang zel ang u" tiin thilpek petu Tarpho Branch YMA chungah hian lawmthu a sawi a ni.

He huna thilpek an hlante chu :- Maian - 3 bags, Antam - 2.5 bags, Phuihnam - 1 bag, Dal - 1Kg, Bekang, Khanghu, Bawkbawn leh Hmunphiah bakah Pawisa fai Rs.7000/- a ni

Hnahthial District chhung Quarantine Centre-a awmte tan leh Covid 19 dona kawnga hmalakna atan hian nimin (Pathianni) pawh khan BCM Model Kohhran Hnahthial chuan DLTF-ah hian Rs.10,000/- (Sing khat) an pe a, MHIP Lungleng Branch Hnahthial pawhin Rs.5000/- (Sang nga) an pe bawk a ni.