Deputy Inspector General of Police Southern Range Pu L.H Shanliana chuan vawiin hian Thingkah a 3rd Indian Reserve Battalion awmna hmun tur a tlawh a, Lawngtlai District chhunga NGOs hrang hrangte a kawm bawk. DIG hian nimin tlai khan Thingkah khawhlui, tuna Thingkah khaw chunga 3rd IR Battalion hote awmna tur hmunhma chu a tlawh a, helai hmun cheibawlna tur sum sawrkar atanga pek a nih tawh avang leh karleh maia hna bul tan tum a nih tawh avanga helai hmun hi rawn tlawh a nih thu a sawi.

Tukin zingkar khan DIG hian Lawngtlai District chhunga tlawmngai pawl hrang hrangte sawmin Lawngtlai Circuit House ah a kawm a. Tlawmngai pawlte chu inpawh tawn tak leh tha taka thawhpuiah a sawm. Pu LH Shanliana chuan kan lo tawn tawhte atanga chhutin Thingkah hmuna 3 IR Battalion sipai lo awm thar hunah thil tha leh thil tha lemlo tam tak thleng thei awma a hriat thu sawiin helai biala mipuite chu kawng tinrenga rilru zau leh puitling tak pu chunga lo dawngsawng turin a ngen a. Battalion a nih meuh hi chuan mi sang chuang kan lo ni tawh thin a, hun rei vaklo chhung chu engtikawng emaw talin boruak a inlumlet ve fo va. Amaherawh chu kum hnih khat a han liam a laichin unau, nupui pasalah kan insiam tawna boruak nuam taka lo herchhuak leh thuai thin, chulai hun inthlakthleng chhunga inpawh tlang taka hna kan thawh ho a tul a, tlawmngai pawlten hlawk takin hna an lo thawk tawh thina, helai hmuna sipaite an rawn inbun hunah pawh tlawmngai pawlte chu kan innghahna in ni tiin tlawmngai pawl hrang hrang aiawha kalkhawm mi 70 te chu a sawm a ni. Chutih laiin Battalion pakhata thlatin hlawh lutkhawm hi nuai 200 chuangte a nih avangin kawng tam takah a chhevel mipuiten an hlawkpui thei dawn a, mi tam tak tan inhlawhna remchang a awm thei dawn bawk a ni a ti bawk.Tukin a tlawmngai pawlte nena inkawm hona ah hian LADC CEM Pu V. Zirsanga pawhin thu a sawi bawk.

Thingkah hmuna 3 IR Battalion awmna tur buatsaihna tur pawisa hi sanction fel tawh niin thla thar atanga hna tan tawh mai tura ruahmanna siam a ni a, a hmun luahtu tur 3 IR Battalion te hi tunah Assam lamah an la awm avangin a hmunhma lo cheibawla bul tan theih tura lo buatsaih turin 2nd Battalion MAP, Lunglei hmuna awmte chu ruat niin, karleh atangin sipai Platoon khat emaw talin an awmchilh nghal dawn nia thu dawn a ni. He hmun cheibawlna tur hian cheng Vaibelchhe 2850 vel ruahman a ni. DIG SR hian vawiin vek hian Aizawl lam panin Lawngtlai a chhuahsan lehnghal a ni.