Vawiin ni 23.5.2014 (Zirtawp) khan Tourist Lodge, Chaltlang-ah Mizoram Agriculture Service Association (MASA) chuan General Conference – 2014 an hmang. He hun hmanpuitu, khuallian Pu R. Lalzirliana, Agriculture Minister chuan, “Agriculture hi Department lian a niin in finna leh thiamna, taihmakna ringin hna kan thawk ang” a ti. Minister chuan, “Agriculture hi ei leh bar hnuk a ni a, nangni hi chu mawhphurhna latu chu in ni. In inpekna leh hmalakna te avangin loneitu tam takte khai chhuah mek an ni a, Farm Mechanization hmangin buh leh bal tharchhuah tihpun a niin hmanraw hrang hrang, loneitute chhawr theih tur ngaihtuah zel a ni” a ti. Khuallian chuan kalkhawmte fuihin, “Zoram mipui, mirethei, ei bara an intodelh theihna atana hnathawktu in nih hi englai mahin theihnghilh hauh suh ang che u. DIKNA, RINAWMNA, TAIHMAKNA nen, in tan ni lo, mipuite tana thawh hmahruaitu in nih hi hre reng chunga hma lam pan turin thawktu zawng zawng te ka sawm che u a. Mikhual rilru ni lo, neitu nihna rilru pu chunga hna in thawh chuan tun hun thar chhungah hian nasa takin Agriculture Department hian hma a sawn ngei ang,” a ti.

He huna khualzahawm, Lt. Col. Z.S. Zuala, Parliamentary Secretary, Agriculture pawhin thu sawiin “Discipline tha tak in nei hi Department hnathawk tha in nihzia ti langtu a ni” a ti a. Production tha tak nei chho thei zel turin Officer kalkhawmte a chah bawk.

Dr. C. Lalzarliana, Director of Agriculture (Crop Husbandry) chuan Conference palaite lawmna thu sawiin MASA Member thahnem tham tak Conference ngaipawimawha lo kalkhawmte chungah lawmthu a sawi a. Department anga hmalakna kawngah thahnemngai leh taima taka thawk chhunzawm zel turin MASA Member-te chu a fuih bawk.

Conference hi MASA President Pu R.K. Nithanga’n kaihhruaiin Pu George Lalthanngura, Secretary General-in Report a pe bawk. He Conference-ah hian MASA Member Grade hrang hranga Promotion hmute leh Ph.D. Degree hmute lawmpuina hlan an ni a, kum 2012-2014 chhunga an Member thite sunna hun an hmang bawk.

Chawhnu lamah rorel a niin an thurel langsar zual zingah Integrated Training Centre (ITC), Hnahthial hming thlak chungchang te, MASA Cadre Post turin Secretary, Additional Secretary, Joint Secretary post nei ve tura Sorkar-a thlen chungchang te leh Transfer Norms chungchang te an sawiho. Rorel zawh hian kum 2014-16 MASA hruaitu tur an thlang nghal bawk.

MASA General Conference-ah hian Mizoram hmun hrang hrang atangin Member thahnem tak an kalkhawm a ni.