3203/2024-2025

2024 Sahmulphah thla ni 26: Deputy Inspector General of Police (Southern Range) tura Mizoram Sawrkarin a dah thar Pu Altaf Ahmad Khan IPS (2010) chuan vawiin, November ni 26, 2024 chawhma dar 11:00 khan Pu C. Lalthanmawia IPS kut aṭanga mawhphurhna lain, DIG (Southern Range) hna a zawm fel.

Pu Altaf Ahmad Khan hian nizan dar 7:30 khan Lunglei lo thlengin, DIG (Southern Range) hna chelh mektu Pu C. Lalthanmawia IPS leh police officer dangte'n DIG (SR) Bungalow-ah zanriah lo buatsaihsakin an lo hmuak a. Vawiin khan DIG (SR) pisaah DIG (SR) kal chhuak tur Pu C. Lalthanmawia leh DIG (SR) thar tur Pu Altaf Ahmad Khan te hian mawhphurhna an inhlan chhawng nghal a ni.

Pu Altaf Ahmad Khan hian kum 1999 khan Jammu & Kashmir State Police Service zawmin, kum 20 chuang inrikrapna tireh tura beihna (counter terrorism) lamah hlawhtling leh hming ṭha takin ram leh mipui him nan a lo thawk tawh a. Police chawimawina sang - President’s Police Medal for Gallantry, President’s Police Medal for Meritorious Service, Jeevan Raksha Padak leh chawimawina chi hrang hrang eng emaw zat a dawng tawh a ni.

DIG (SR) kal chhuak Pu C. Lalthanmawia hian a hna thar tura sawrkarin a ruat Deputy Inspector General of Police (Northern Range) hna a zawm ve thung dawn a ni.