3204/2024-2025

Dated Aizawl, the 26^th November, 2024: Vawiin chawhma dar 11:00 khan, Mizoram State Commission for Protection of Child Rights (MSCPCR) chuan Planning & Programme Implementation Conference Hall-ah Consultation Meeting a buatsaih a. He Consultation Meeting hi Pi Lalrinpuii, Hon’ble Minister, SW, TA & WCD hova ni 10.10.2024 (Ningani)-a Department hrang hrang hotute nena Meeting an lo neih tawha Resolution Pass tawh bawhzuina leh hmalakna tur te ruahmanna siam ho a nih theih nan MSCPCR chuan he Consultation Meeting hi a buatsaih a ni.

He Consultation Meeting-ah hian naupang enkawlna hmun Special Home-a naupangten bahlah lova zirna an chhunzawm theihna tura Zirna In/School  tih changtlun dan te ngaihtuah ho a ni a; Children’s Home-a naupang awm ten kum 18 an tlin hnu a letna leh hawna tur ṭha leh belhchiandawl chhungkua leh mahnia inenkawl thei tur leh mahni ke a ding thei tura thiamna mumal nei lo te tana enkawl zuina (After Care Programme) tihhmasawn theih dan turte sawiho niin, After Care Programme atana fund-te a beitham em avanga tuna programme kalpuilai pawh duh ang a tihhmasawn a harsat zia te tarlan a ni a;

MSCPCR chuan tunhnaiah Aizawl leh Champhai District chhunga naupang enkawlna hmun Child Care Institutions (CCIs) te a tlawhchhuak mek a, hemi aṭang hian Children’s Home hrang hranga Fund indaihlohna te, a thawktu te indaihlohna te leh harsatna hrang hrang an tawh te a taka hmuhpuiin, an harsatna te sutkian a nih theihna turin sawihona neih a ni bawk.

School Education Department enkawlna hnuaia hmalakna te sawiho a ni a, School Bag rit lutuk hi zirlai te tan phurrit leh hriselna lam thlenga nghawng ṭha lo nei thei a nih avangin School Bag rih zawng tihniam thei tura hmalak dan turte ngaihtuahho a ni a, heng bakah zirlai kaihhnawih inenkawlna hrang hrangte naupang tana hmasawnna tur leh phurrit awm lo tura kalpui leh ruahmanna siam a ṭul zia te sawiho a ni.

He Consultation Meeting hi Pu Jimmy Laltlanmawia, Chairperson, MSCPCR chuan a kaihruai a; Pi Zoramthangi Chhangte, Director, WCD te, Pi Sailopari, Deputy Director, WCD te, Pu Laldingliana, Deputy Director, School Education Department te, Pu PC Vanlalnghaka Deputy State Project Director, Samagra Shiksha Mizoram te, Pi Amy Lalrinpuii, Principal Programme Manager, Mizoram State Child Protection Society te, Pi Lalruatkimi, Programme Officer, Mizoram State Child Protection Society te, Pi Zothanpari, Superintendent, Aizawl Special Home te he Consultation Meeting ah hian an tel a ni.