India sawrkar chuan tangkafai hmang lova hralh sum thila indawrna - cashless payment uar chhoh zel a tum avangin ram chhung khawpui 100 ah ‘Digidhan Mela’ buatsaih a ni a. Mela hi rampumah January thlaah nei tanin April ni 14 khan kharna hun hman a ni a. He ni hi Good Friday a nih avangin Mizoram Sawrkar chuan Kristiante ni pawimawhah he hun hi hmana remloh thu sawrkar laipui a hriattir a. Kharna inkhawm hi vawiin chawhma khan I&PR Auditorium, Aizawlah Chief Secretary Pu Lalmalsawma hovin hman a ni. 

Pu Lalmalsawma chuan Digidhan mela tluang taka hman zawh a ni chu lawmawm tiin mipui, sumdawng leh banker te indawrnaah tangkafai hmang lova digital hmanga indawr chu khawvel changkanna in a ken tel pawimawh tak a ni, a ti a. Ram changkang apiangah cashless transaction an uar a, Sweden ram chu cashless transaction uar ber ram a ni, a ti. Digidhan Mela hmangin zirtirna uar zawka kalpui a ni tiin Chief Secretary chuan mipuiin a tangkaizia an hre chho mek a, chutihrualin bank branch omlohna thing tlang khaw hmun thenkhatah harsatna a awm thei niin a sawi a. He harsatna sukiang tur hian sawrkar chuan Reserve Bank of India dawrin bank branch hawn theihlohna hmunah an aiawha transaction khawih thei tur Banking Correspondent atan a khaw mi ngei ruat tum a ni a, inbiakna a kal mek a ni, a ti bawk. 

India ram pumah kum 2017-2018 chhungin digital transaction target cheng vaibelchhe 2500 a nei a. He hun chhunga Mizoram target chu cheng vaibelchhe 1.5 a ni. 

Digidhan Mela kharna inkhawm hi ICT Secretary Er.R.Lalfanliana'n a kaihruai a. Mizoram Merchant Association (MIMA) General Secretary Pu Jeffrey L Fanai leh Lead Bank Manager Pu Rualkhuma ten thu an sawi a. Informatics Officer Pu Zothanzauva'n technical report pe in ICT Chief Informatics Officer Dr.Lalthlamuana'n lawmthu sawiin hun a khar a ni.