India sawrkarin pawisa note tel lova mipuiten mobile phone hmanga thil lei leh hralh theih na tur leh, hemi hmanga pawisa thawn nan cashless payment uar chhoh zel a tum avangin thil leitu leh sumdawng ten hemi chungchang an hriat chian theih nan February ni 17 leh 18 hian Millenium Centre ah ‘Digidhan Mela’ buatsaih tum a ni a. Hemi chungchang lo thlir lawk na atan vawiin chawhma dar 11:00 am khan NLUP Conference Hall ah Department of Information and Communication Technology (ICT) buatsaih meeting pawimawh tak neih a ni.

Meeting hi Pu C. Lalhmachhuana ITS, Secretary, ICT Department in a kaihruai a, Digidhan Mela chu pawisa note hmang lova mipuiten thil lei leh hralh uar zawka an tih theih dan hrang hrang pho chhuah na tur a nih thu a sawi. Pu C. Lalhmachhuana chuan pawisa note thih (demonetisation) avanga harsatna mipuiin an tawh chu sawrkar-in sutkian a tum mek a ni tiin, technology hmanga pawisa hman (cashless transaction) theih nan sawrkar in hma a la nasa hle, a ti. Digidhan Mela ah hian Aadhar Card, PAN Card leh Bank Account la neilo te tan pawh a hmunah siam theih a nih tur thu ICT Secretary chuan a tarlang bawk.

Pu Gospel Ramdinmawia, Mizoram State E-Governance Society (MSEGS)chuan Digital Payment chungchang power point hmangin a hrilhfiah a, National Payments Corporation of India leh Reserve Bank of India hmalakna Unified Payment Interface (UPI) leh Bharat Interface for Money (BHIM) Application hmanga awlsam taka pawisa note hman ngai lo a sumdawng leh mipui te an indawr theih dan a sawifiah a ni.

Meeting-ah hian ICT hotute leh Bank hrang hrang hotute bakah Indian Medical Association leh private hospital aiawhte, Mizoram Liqour Vendors Union, Mizoram Merchants Association, Mizoram Indane Distributors Association, Rajiv Gandhi Gramin LPG Vitrak, Zoram Drivers Union, Mizoram Taxi Association aiawhte an tel bawk.