Vawiin chhun dar 12:00 khan Presbyterian English School Serchhip ah Digital Awareness leh School website hawnna hun neih a ni a.

He hun hi Pu Vabeimozachhi Chozah, MCS ASO Serchhip leh E-district nodal officer ni bawk chuan a hman pui a, internet leh computer kaihhnawih thil te hi tunlai khawvel thang zelin a ken tel anih avangin digital khawvela kan hriatna kan tih zau hi a tul hle a ni a ti. hemi rual hian Presbyterian English School Serchhip website thar www.pesserchhip.in chu a duh apiangte tlawh theih turin a tlangzarh nghal bawk.

He hunah hian Pu Denghlira, e-District Manager Serchhip chuan naupangte hnenah Digital device hrang hrang pawimawhna leh Aadhaar Card, Online Payment system leh e-governance kalphung te naupang te hrilhriatna a nei. Thusawitu dang Pu CMS Dawngliana State Bank of India, Serchhip Branch pawhin naupangte tana Bank Account neih a pawimawh zia leh Bank account vawn dan te, Bank account leh transaction chungchanga naupang te hriattur hrilhhriatna a nei bawk.

He Digital Awareness Programme hman chhung hian PES Serchhip ah hian e-District kaltlangin School naupang Aadhaar Card la neilo leh correction siam duh te tan enrollment neih nghal a ni a. Presbyterian English School Serchhip hi Serchhip a Private School hlun ber te zing ami niin kum 1995 atang khan din tan a ni. Mizorama Presbyterian English School Synod phal naa din zinga a ding hmasa ber a ni. Tunah hian KG atanga Class X thlengin zirlai 774 an nei mek a, kum 6 kalta chhunga an School atanga Class X zirlai HSLC Exam zingah failed an la awmlo a ni.

He programme hi School Principal Pu Laldinpuia chuan a kaihhruai a, Digital Awareness Programme an neih chhan sawiin tunlai khawvel thang zelah thil thar chi hrang hrang a chhuak zel a, chung thil thar leh a hman dan te chu zirlai naupang ten an hriat a tul avangin leh engkim online system a kalpui a nih tak avangin zirlai ten tunlai khawvel kalphung thar hi an hriat a tul tihna an neih avanga he programme hi siam an nih thu a sawi.