Vawiin hi mi dangte nun chhan nana thisen petute ni, World Blood Donor Day niin Mizoram State AIDS Control Society (MSACS) leh Association for Voluntary Blood Donation (AVBD) te chuan he ni pual hian Chanmari YMA Hall-ah inkhawm an buatsaih a. Health Minister Pu Lal Thanzara chu khuallian a ni.
Pu Lal Thanzara chuan damlo mangang leh tanpui ngaite tana a thlawna thisen petute tluka zah tur leh ngaihsan tur an awm chuanglo tiin thisen pek intihhmuh a, incheina mawi leh ropui berah hmang turin kalkhawmte a fuih. Khawvelah kum tinin emergency-a thisen pek ngaite tan blood bank a thisen awmsa hmangin mi nunna nuai tam tak chhanhim a ni tawh a, khuarel chhiatna leh vanduaina avanga thisen mamawh hi tute pawhin an tawh theih vek a nih avangin tlawmngaia thisen pek hi a tul tak meuh a, hetiang taka pawimawh a nih avangin kumin World Blood Donor Day thupui pawh “Engnge tih theih kan neih? Tunah thisen pe la, pe chhunzawm zel rawh” tih thlan a ni, Health Minister chuan a ti.
Aizawl DC Pu Kanan Gopinathan pawhin thu sawiin thisen chu a petute tana hekna leh tawrhna awm lo, a dawngtu damlote nunna hial chhan thei a nih avangin a pawimawhzia hriaa thisen pek uar sauh sauh turin kalkhawmte a fuih a. Aizawl DC office leh Aizawl Civil Hospital Blood Bank tangkawp chuan hmalakna thar duangin a thlawna thisen petuten an thisen pek sa damlote tana hman a nih apiangin an mobile phone-ah lawmthu sawina leh an thisen damlote tana hman a nih thu hriattirna an dawng thin tawh dawn tih Aizawl DC chuan a sawi a ni.
Programme-ah hian Voluntary Blood Donation Award hrang hrang sem a ni a. Mizoram pum huapa Presbyterian Kohhran Kristian Thalai Pawlten thisen an pek that avangin Central KTP, Mizoram Synod hnenah Special Award hlan a ni a. KTP hian Mizoramah donation camp tum 49 huaihawtin thisen unit 3798 an pe a ni. Aizawl District huamchhungah religious category-ah Kohhran Thianghlim Youth Evangelical Front (YEF) in Voluntary Blood Donation Award lawmman pakhatna dawngin unit 780 an pe a; Educational Institution-ah Govt. Aizawl College NSS-te chuan thisen unit 354 pe in pakhatna an ni a; YMA category-ah thisen unit 132 petu Keifang Joint YMA chu pakhatna niin miscellaneous category ah Inter College - Youth Adventure Club chu pakhatna niin unit 120 an pe a ni.
Kum 2016-17 chhung khan Mizorama thisen pek zat chu unit 25,895 a ni a, heta unit 21,563 (83.27%) hi a thlawna pek a ni a. Kohhran leh sakhaw kaihhnawih pawl hrang hrangin unit 8146 an pe a, educational institution ten unit 3986, YMA in unit 1988 leh pawl dang (miscellaneous) in unit 2303 an pe a ni. Pawl hminga pek ni lo, mahni duhthu leh remchan anga thisen pek zat hi kum 2016-17 chhung khan unit 5140 a tling a. India rama thisen petu 5% vel chauh hi hmeichhia an nih laiin Mizoramah chuan 25%-30% vel a ni.
World Blood Donor Day hi Mizoram hmun hrang hrangah hman niin a lawmna pui ber Aizawla buatsaihah hian Mizoram State Aids Control Society (MSACS) Project Director Dr. Lalmalsawmi chu Chairman niin ABVD Secretary Pu C.Lalnunnema’n annual report a pe a, Civil Hospital Medical Superintendent Dr.K.L.Remsanga’n lawmthu sawina hun a hmang a ni.
