Digital India Week puala Information & Communication Department ten Digital India Marathon an buatsaihah mi 400 chuang zet Sikulpuikawn atanga Chanmari kawn helin an tlan a. He marathon hi inrinni zing dar 6:00-ah ZENICS Chairman, Pu Chalrosangan a vai liam a; Pu C. Lalhmachhuana, ICT Secretary-in a tawiawm bawk a ni. Marathon-a tlante zawng zawng hian T-shirt tha tak an dawng vek a. Mi 400 chuang lai an tlan avangin t-shirt chang lote pawh pek leh vek tum an ni.

Digital India Marathon-ah hian lawmman pakhatna latu chu Vanlalpeka, Ramthar Veng, Lunglei niin Rs. 5000/- a dawng a, pahnihna chu T. Malsawmkima, Saiha niin Rs. 3000 a dawng a, pathumna chu Lalrinnunga, North Chaltlang niin Rs. 2000 a dawng a ni. Anni bakah hian consolation prize mi 20 te hnenah Rs. 500 theuh hlan an ni bawk. Marathon tlante zingah hmeichhe tlan an tam avangin an puala lawmman hran siam chawp hial a ni a. Hmeichhe zinga lawmman pakhatna latu chu Kross Hmangaihsangi niin Rs. 3000 a dawng a; pahnihna chu Zonunsangi niin Rs. 2000 a dawng a; pathumna chu Zonunthari niin Rs. 1000 a dawng thung a; an vaiin SAI-a training lai vek an ni.