Nimin khan Divisional Horticulture Office chuan Kolasib District huam chhunga  NLUP-a Horticulture Trade (Khuva, Lakhuihthei, Serthlum leh Iskut chin thlangtu) 2^nd Phase-a beneficiaries te hnenah Final Installment an pe chhuak a.  NLUP semna hi  Kawnpui ah chuan Parliamentary Secretary Pu Hmingdailova Khiangte, Vairengte ah Parliamentary Secretary Pu K. Lalrinthanga  leh Kolasib ah MIFCO Chairman Pu P.C. Zoram Sangliana ten an hmanpui a ni.

Kawnpuia NLUP semna hi Kawnpui YMA Hall, Venglai ah buatsaih niin Tuirial Bial chhunga NLUP 2^nd Phase a beneficiaries mi 312 te hnenah Final Installment hi pek a ni a. He hun hmanpuitu Parliamentary Secretary Pu Hmingdailova Khiangte chuan NLUP chu mi thenkhat ten tih thuanawp tum mahse a tum – miretheite khaichhuah bakah mahni kham khawp thawh chhuahna kawnga kuthnathawktute leh loneitute puih anih avangin a kal tluang zel a, Sawrkar pawhin a chhunzawm zel dawn a. Amaherawhchu a ti tha duh lo leh dik lo taka he tanpuina sum hmang an awm chu vanduaithlak tiin heng mite hi Sawrkar chuan NLUP tanpuina sum a pe zui dawn tawh lo a ni, a ti a. NLUP hnuaia tanpuina dawngtu te chu an vanneih zia hre renga theihtawp chhuaha inbuatsaiha hlawhtling ngei turin a fuih a ni.

Vairengte a NLUP semna hi Community Hall Vairengte ah neih niin Serlui Bial chhunga NLUP 2^nd Phase a beneficiaries mi 276 te hnenah Final Installment hi pek a ni a. He hun hi Parliamentary Secretary Pu K. Lalrinthanga’n a hmanpui a ni.

Kolasib a NLUP semna hi Synod Conference Hall Diakkawn ah buatsaih niin MIFCO Chairman Pu P.C. Zoram Sangliana’n a hmanpui a. Kolasib Bial chhunga NLUP 2^nd Phase a beneficiaries mi 196  te hnenah Final Installment hi pek a ni.

Kolasib Horticulture Division hnuaia hian NLUP 2^nd Phase ah beneficiaries mi 784 an awm a, hetah zinga mi 618 in Kuhva, mi 96 in Serthlum, mi 26 in Lakhuihthei leh mi 44 in Iskut chin an thlang a. Nimin khan Final Installment hi a pawisa faiin beneficiaries te Bank account ah theuh thun nghal a ni a. NLUP 3^rd Phase ah Turial Bial ah hian beneficiaries mi 60, Kolasib Bial ah mi 55 leh Serlui Bial ah mi 101 te an awm a. 4^th Phase ah hian Turial Bial ah beneficiaries mi 24, Kolasib Bial ah mi 29 leh Serlui Bial ah mi 46 an awm bawk a ni.