Vawiin chawhma dar 11:00 khan “Digital India Week-2015” hawnna inkhawm chu DC’s Conference Hall, Saiha-ah neih a ni.

He Week hawnna inkhawm hi Pi Marilyn Rualzakhumthangi, S.D.O. (S) Saiha District, Saiha chuan a kaihruaia, he Week hman anih dan leh a pawimawh dan hrang hrang te sawihawnna a neih hnu ah he Week hmanna-a Khuallian District Bawrhsap Pu R.Zarzosanga chuan thu sawiin tunlai khawvelah chuan naupangte kan vannei hle a, Computer kan hmang nasa hle tawh a Computer hian kan nun hi kawng engkimah a khawih danglam ani tiin kan hman danah erawh kan fimkhur a  ngai hle ani a ti bawk. Tunlai Computer Technology hi a tangkai zawnga kan hman thiam a pawimawh thu sawiin a tangkai dan hi kan luhchilh poh leh kan tangkaipui dawn a ni a ti bawk. Pu C. Simon, D.I.O., N.I.C. Saiha pawhin thutawi sawina hun a hmang a, programme karlakah zaithiam zai te ngaihthlak a ni.

Week hawnna inkhawm hi Session 2 ah then niin chawhnu lam session ah chuan Pu ZF Rokima, e-District Manager, Saiha chuan “Cyber Security and Media Security” tih hmangin paper a present a, he Week hawnna inkhawm ah hian Saiha khawpui chhung a Head of Department te leh School hrang hrang naupangte leh chanchinthar thehdarh tute an tel thahnem hle a ni.