Vawiin khan Social Welfare Department buatsaihin Champhai I&PR Conference Hall-ah Awareness Campaign Programme on Various Issues Concerning Women and Children tih thupui hmangin inzirtirna neih a ni a. He hun, hmeichhia leh naupangte dikna humhalh inzirtirna atan buatsaihah hian Champhai DC Pu H. Lalengmawia chu khuallian a ni.

Khuallian chuan hmeichhia leh naupangte humhimna chungchang sawi tam hlawkthlak thu tarlangin, mi tam tak chuan an dikna chanvo an hriatloh avangin an kut tuar te pawh an sawichhuak ngamloh phah thin a ni, a ti a. Ram sorkarin hmeichhiate thlavang a hauh nasa hle a, chuti chung chuan dan lamah pawh thangharhin, mahni dikna hre ve tho zingah pawh chhungkaw hmingchhiat hlauhna avang ten ke pen chhuak ngamlo an la tam chu pawi a tih thu sawiin, huaisenna nen kan hmanrua tha tak Dan in min pek hi kan lek ngamlo a nih chuan dikna a lal thei dawnlo a ni, DC chuan a ti.

Hmeichhiate chanvo leh dikna sawinaah hian mipa te an banglo mai nilovin, mawhphurhna ropui tak an chelh tlat tih chu hriat tlan pawimawh a tih thu DC Pu H. Lalengmawia chuan a sawi a. Khawtlang siamtha tur chuan chhungkua a tan hmasak phawt a tul thu te tarlangin, vawiina awareness campaign buatsaih chuan a taka hmasawnna a thlen theih nan  kalkhawmte chu thu pu darhtu ambassador-a in chan turin khuallian chuan a sawm bawk.

Vawiin hun hi Pu Lalbanglova, CDPO, Champhai ICDS Project in a kaihruai a. Pi Chuauzikpuii, Asst. Director, Social Welfare Department chuan Domestic Violence, Sexual and other issues tih thupui hmangin zirtirna a pe a. Pu Jimmy Laltlanmawia, Social Activist hnen atangin Immoral Trafficking chungchang ngaihthlak a ni a. DCPO Champhai in Child Rights & Protection chungchang sawiin, Pi H. Zaimawii, CDPO Khawzawl leh Protection Officer ni bawk chuan Domestic Violence Act chungchang a sawifiah bawk.

Vawiin programme ah hian MHIP, YMA leh VC hruaitu leh member-te an kal bakah bakah official thenkhat leh media lam an tel bawk.