Vawiin ah khan Health Department hnuaia programme – NPCDCS (National Programme for Prevention and Control of Cancer, Diabetes, Cardiovascular Diseases and Stroke) chuan Review Meeting leh Training ni 2 awh tur chu I&PR Conference hall ah an hmang tan a. He hunah hian Dr. K. Ropari, Principal Director, Health & Family Welfare Department chu Khuallian niin, Dr. Rohmingthanga Ralte chu Khual Zahawm atan hman a ni.
Dr. Lalbiak Kima, Director, Hospital & Medical Education chuan he hun hi kaihruaiin, Department a mi pawimawh tak tak ten he hun hi an hmang a ni. Meeting hawnna hunah hian Dr. K. Ropari chuan tunlai khawvel changkang chho zelah kan nunphung (lifestyle) in a zir loh avanga natna benvawn tak tak,NCD (Non Communicable Diseases) natna kan tih mai – cancer, zunthlum, lung natna, heart attack leh stroke vei leh thihpui kan tam ta tial tial tiin a sawi a. Mizo zingah ngei pawh hetiang natna enkawl lama mithiam tak tak te lo chhuak zelin, damlo an enkawlna tur atana an mamawh ang ang te Department chuan a ngaihtuah sak zel a. Department chhunga thawhktu hrang hrang te tanrual leh thawhhona tha a awm a tul zia a sawi bawk.
NPCDCS programme chungchang sawi hawngtu Dr. Eric Zomawia, State Nodal officer ( NCO ) in a tarlan dan chuan - Awm awl lutuk a exercise lak ngai loh te, thau leh mawm leh thlum ei nasat lutuk te, chi al ei tam lutuk te, thlai leh thei ei tlem avangte, vaihlo hman avangte leh zu in nasat avang te in NCD natnate hi kan nei a . Natna benvawn, rei tak enkawl ngai, sum tam tak senso ngai an nih avang in khawvel pumah heng NCD natnate hi buaipui an hlawh tawh a. Mizoramah pawh heng NCD natna do tur hian NPCDCS programme chu tan a ni tawh in CMO Office hrang hrangah NCD Cell siamin District Hospital leh CHC ah te NCD Clinic dah an ni. Heng NCD Clinic ah hian Zunthlum, BP Sang, Lung na, Cancer an vei leh vei loh an lo endik sak thin a, kum 30 chunglamte chuan heng NCD Clinic ah hian an in entir ve a tul thu a sawi a. NCD natna laka Mipui an inven theih dan te, cancer laka an inven dan tur leh hmuhchhuah hma theih dante a sawi bawk a ni.
He hunah hian Aizawl, Lunglei, Saiha leh Champhai District chhunga NCD Clinic leh NPCDS dinhmun tarlanna leh sawi hona neih zui a ni a. Damdawi lam mithiam hrang hrang – Dr.Jeremy L Pautu (Medical Oncologist), Dr. Loncy V Lalzarliana (Cardiologist), Dr Saia Chenkual (Surgeon), Dr Zorengpuii (ENT Specialist), Dr David Lalruatsanga (Medicine Specialist), Dr Lalruatpuii (Diabetologist), Dr Vanlaldiki Ralte (Psychiatrist), Dr Lalruatdiki Chawngthu ( Programme Officer) leh Margaret Lalremruati (Dietitian) te’n zirtirna an pe bawk a ni.
