Governor Lt. General Nirbhay Sharma PVSM,UYSM,AVSM,VSM (Retd) chuan vawiin khan Aizawl Raj Bhawan-ah All India Radio thawktute kawmin, mipui rawngbawlna zau zawka kalpui dan a sawipui a, Mizo thalai te tana zirtirna tha nei thei programme, a bikin ruihhlo laka fihlim tura inzirtirna te uar zawka kalpui tha a tih thu a sawi a, hei bakah hian thalaite zinga ramchhung leh khawvel pum huapa langsar te chungchang tihchhuah tam a duh thu a sawi a ni.

Chhiatna hrang hrang thleng thei laka invenna leh thlipui leh lirnghing ang chi chhiatna hrang hrang hriatlawk theih a awm changa mipuite hrilh darh theih dan tur te dap ni se a ti a ni.

Governor chuan Mizo te zingah mahni tawng chauh hmang, saptawng leh Hindi hmanglo an tam chu a ngaihmawh thu sawiin, lehkhathiam tamtak awmna Mizoramah Mizo ten tawng chi khat chauh ni lo, an lo nal ve theih nan hmalak tha a tih thu a sawi a, hemi kawngah hian tihtheih a neih chuan hmalak pawh a inhuam thu a sawi a ni.

AIR Staff te hi Station Director Pu D.R. Lalropuia, Asst Station Director Pi Linda Zopuii Mukherjee leh RNU News Editor Pu Gin Gangte te an ni a, Mizorama All India Radio mamawh hrang hrang, staff indaihlohna te leh khawl lam mamawh te ti puitling turin, Governor hian chak zawka bawhzui a tum thu a hrilh a ni.