Vawiin chhun dar 12:00 khan DLAO Aizawl leh Seling Village Council tangkawpin an buatsaih Digital India Week denchhenna 'Special Gram Sabha' chu Seling YMA Run-ah neih a ni.

Sorkar laipuiin ni 1-7 July, 2015 chhunga Digital India Week rampuma a hman mekah, Local Administration Department chuan Mizorama District hrang hrangah DLAO leh Village Council te nena tangkawpin Special Gram Sabha a kova, sorkarin e-service a chhawpchhuah leh internet te tangkai zawka mipuiten an hman theih turte inhrilhhriatna leh inzirtirna hun a buatsaih a ni.

He hun hi DLAO Aizawl, Pu K.Lalrohlua chuan kaihruaiin, inlawmna thu a sawi a. Pu C.Lal Thlamuana, Joint Director, Local Administration Department chuan Digital India Week puala Special Gram Sabha koh a nih chhante sawiin, Dan ang thlapa Gram Sabha mumal tak kalpui anih tawh tur thu leh hemi kaltlang hian mipuite chu khawtlang hruaitute tawiawma, khaw hmasawnna atana an ngaihtuahna lo seng zel turin a chah bawk.

He huna Resource Person, Pu David Lalmalsawma, Coordinator, ZENICS  chuan sorkarin e-service hrang hrang mipuite tana a chhawpchhuahte chipchiar taka hrilhfiahna leh zirtirna hun a hmang bawk.

Pi Dorothy Muansangi, Asst.Director, LAD chuan khawtlang hruaitute leh mipuiten an hman tangkai tur, internet leh PES Application hrang hrang hmanga an Department hmalakna leh hmachhawp hrang hrangte sawifiahna hun a hman zawhah, Pu R.Lalnunthara, VCP, Seling chuan lawmthu sawiin hun a khar a ni.