Vawiin chawhnu khan I&PR Auditorium-ah 'Closing Ceremony and Award Distribution of Digital India Week,2015' neih a ni a, ICT Minister Pu Lal Thanzara'n a hmanpui a, lawmman hrang hrang a sem nghal.  

Pu Lal Thanzara chuan thu sawiin, tunlai khawvel thangchho mekah hian Mizoram pawhin IT lamah hma a sawnin khawvel ram changkang te pen rualin a pen ve zel a, khawvelin a kalpui tawh avangin helamah hian kan ngaihtuahna pawh senga rilru pawh kan pek tam a tul tawh ani tiin, Prime Minister Pu Narendra Modi a'n PM online a chhawpchhuah ang hi CM online pawh Mizoramah siam mek ani a, reilote ah tangkai taka hman theih thuai a nih tur thu a sawi a, kan ramin hnam changkang zawkte a um phak ve  zel theihna turin sawrkar, khawtlang leh  mimal tanho a tul thu a sawi bawk a ni.

He kharna inkhawm hi Pu C. Lalhmachhuana ITS, Secretary, ICT chuan a kaihruai a ni. A kharnaah hian ICT Department ten ruahmanna an siam angin, Mass Communication Department, MZU ten Mizoram Sawrkar website tha an thlanchhuah 5-te hnenah lawmman hlan a ni a. Hetih rual hian computer programming intihsiakna Hackathon lawmman sem nghal a ni.

Department hrang hrang website 144 lai Mass Communication, MZU te hian endikin, hetiang hi lawmman lak dan a ni: Pakhatna - Taxation Department; Pahnihna - Forensic Sciece Lab.; Pathumna - RD Department (E.Lungdar Block); Palina - I&PR Departement leh Pangana - DP&AR Department website te a ni.

Hackathon-ah hian Lushai Media ten lawmman pakhatna an dawng a, Lalthantluanga leh Lalhmachhuana ten lawmman pahnihna leh pathumna te an dawng a ni. SenhriHack-ah hian a tel zawng zawngten Senhri CMS hack thei an awm loh avangin lawmman latu an awm ta lo a ni. Senhri CMS hi tun atanga rei lo teah ICT Department ten department hrang hrang website atana an content management system hman tur a ni.