Chief Minister Pu Lal Thanhawla chuan department sum tam neite hian an hman that loh chuan engtihnamah an nilova, dik taka hmanna hian kori a tu zawk a ni a ti. He thu hi vawiina Minor Irrigation Staff Welfare Association Mizoram (MISWAM) in General Body Meeting vawi 3-na Art & Culture Auditorium, Berawtlang-a an neih a hmanpuina a a sawi a ni.

Chief Minister chuan Minor Irrigation department-a hnathawk ten department te tak anga inngaihna an neih thin chu, ‘department te ber pawh ni ula, thahnemngai tak leh rinawm taka hna thawk a, a nihna tur dik taka sum in hman chuan department ropui ber in ni thei a ni’ a ti a. Sum tam tak neia hman that siloh chuan awmzia a neilo a ni a ti a. Kan awmna theuh hi Pathianin a rawngbawl tura min dahna anih avangin, rinawmna, dikna, taimakna leh Amah tihna nen hna kan thawk tur a ni a ti. Corruption hi eirukna chauh a nilova, tlemte thawha tam tak lak tumna te, thatchhiatna te, zawmthawtna te, zelthelna te leh kuttling lova sum lak tumna te hi corruption vek a ni a ti a. Tunah chuan corruption zung hi kan phawi tawh a, a phoro erawh hun ala duh deuh ang a ti.Chuvangin kan zavai hian a chhelai siam thatu tur kan ni a ti.

Minor Irrigation department chu loneitu leh kuthnathawktute innghahna, an buh leh thlai mamawh, tui petu an nih avangin an pawimawhna an hriat reng a tul a ni, Chief Minister chuan a ti a.Diklo taka hna an thawh a thiang lova, an hnuaia hnathawkte enkawltu an nih avangin, hna that leh chhiatah mawh an phur a ni a ti. Chuvangin thenfai tur zingah an awm ve ang tih a hlauh thu sawiin, neitu rilru pu chunga, rinawm taka thawk turin a chah a. Ei leh bara kan intodelh theihna tur kawngah Minor Irrigation atang hian uar zawka tan kan lak a ngai a ni a ti a. Minor Irrigation department chu ‘department pawimawh ber in nih loh pawhin a dawttu chu in ni ngei ang’ Chief Minister chuan a ti a ni.

Chief Minister chuan kan budget zahve deuhthaw hi sorkar hnathawkte hlawhah a kal thu sawiin, heti chung hian hlawha lungawilo an la awm a ni a ti a. Sorkar hnathawkte hian an hlawh hu hi ram leh mipui tan an thawk em tih an ngaihtuah fo a tul a ni a ti a. Chuvangin kan mamawh ber chu moral reformation, kan rilru put hmang thlak danglam a ni a ti. Tun Independence Day dawnah lungawi lohna lantira mass casual leave lak tum an awm thu sawilangin, mass casual leave lak hi conduct rules in a phal lo a ni a ti a.National Day tibuai zawnga an kal chuan sorkar chu a ngawi mai mai lovang a ti a. Sorkar hnathawkte welfare chu sorkar ngaihpawimawh hmasak ber a ni a ti.

Chief Minister chuan Minor Irrigation changtu Minister anih anga he hun a hmanpui thei chu inhmelhriatna hun lawmawm tak a ni a ti a, he General Body Meetinga tel ve tura an sawm chu lawmthu a sawi bawk a ni. MISWAM hmingin department hotu Chief Engineer Pu Lalthanliana’n Chief Minister hnenah hian Chief Minister’s Relief Fund atan Rs.20,000/- a hlan bawk.

Khualzahawm Pu H.Darzika, Secretary, Minor Irrigation chuan Minor Irrigation budget 95.26% chu hnathawhna tur anih thu a sawi a. Department hrang anga kum 2007 a Agriculture atanga a indan khan hnathawk mi 142 an awm thu sawiin tunah chuan temporary a thawkte tiamin mi 298 an awm mek a ni a ti.

Meeting hi MISWAM Vice Chairman Er. Laldingliana’n a kaihruai a. MISWAM ah hian regular staff aiin member an tam zawk a ni. Chawhnu lamah rorel leh hruaitu inthlanna an nei zui bawk a ni.