No.3193/2021-2022
Aizawl, 29th November, 2021 :Vawiin khan Department of Information and Public Relations (DIPR) chuan an Director Pi Lallianpuii hovin DIPR Auditorium-ah India rama civil mi te chawimawina sang Padma Shri dawngtu Pu Lalbiakthanga Pachuau lawmpuina hun an hmang.

Pi Lallianpuii chuan journalist te leh DIPR chu chhungkua ang maia inkungkaihna nghet nei, thawkho leh inmamawh tawn an ni a, “Kan chhungkaw zinga miin hetiang ang chawimawina sang Padma Shri hial a dawng hi kan chhuangin kan lawmpui tak meuh a ni”, a ti. Mihring dam chhung tawiteah chawimawina, award tenau deuh pawh ni se, dawn a har em em a; ram pum huap chawimawina sang Padma Shri Pu Lalbiakthanga’n a dawng thei chu a lawmawm dan a thukin a sang em em a ni, Director chuan a ti a. India rama working journalist upa ber, kum 94 ral a kai tawh hnuah pawh chawl loa thawk thei, teirei peih leh taima, journalism chauh pawh ni lo social work thlenga Mizoram tana sulsutu a ni tiin Pu Lalbiakthanga Pachuau chuan he chawimawna sang a dawng hi a phu em em a, a nun atangin entawn leh zir tur tam tak a awm a ni, a ti.

Mizoram Journalists’ Association (MJA) President Pu Zonunsanga Khiangte pawhin lawmpuina thusawiin MJA member tanglaiin India rama chawimawina sang Padma Shri a dawng chu an chhuang takzet tih a sawi a. A chanchin tlangpui tarlangin mi entawntlak, hun vawng dik, mi taima leh teirei peih, journalism bakah khawtlang rawngbawlnaah leh kohhran rawngbawlna thlenga sulhnu nei tha a ni, a ti.

Padma Shri Award dawngtu Pu Lalbiakthanga Pachuau chuan DIPR-in a award dawn an lawmpui avangin lawmthu a sawi a. A thawhpui journalist te leh DIPR-a thawktu, hmanlai atanga vawiin thlenga amah thlawp a, fin chhuah leh kaihruaitute vanga he award dawng thei a ni, a ti.

Pu Lalbiakthanga Pachuau hi kum 1980 atang khan tun thlengin Active Journalist a la ni reng a. India rama journalist thawklai zinga upa ber a ni. Kum 2016 khan Mizoram Sawrkar chuan ‘Prominent Press Representative’ nihna a pe a. MJA -ah President Term 3, Vice President term 2 leh Secretary term 1 a chelh. Mipui vantlang rawngbawlna kawngah a thawh hlawk hle a. Tunhnai maia nihna a chelh mek leh a chelh tawhte chu : 1). President, 2nd World War Veteran Association, 2). President, Mizoram Social Defence Union leh 3). President, Association for Voluntary Blood Donation, Mizoram (2010 -2014) a ni. A kaihhruaina hnuaiah Voluntary Blood Donation chuan hma a sawn hle a; President, AVBD a nih hun chhung khan, kum 2001-a voluntary blood donation 22.47 % chauh a nih laiin kum 2011 ah chuan 91%-ah a chho thei a ni. Mizoram-ah Cooperative Movement hmahruaitu leh Mizoram Co-operative Society-a President hmasa ber a ni bawk.

Vawiin programme hi DIPR Jt.Director Pu C Lalnunkima chuan a kaihruai a. Director Pi Lallianpuiin lawmpuina thuziak a hlan a ni.