No.3192/2021-2022
Aizawl, 29th November, 2021 :Lunglei DC Pu Kulothungan A chuan vawiin khan Lunglei RD Block huamchhunga MGNREGA hnuaia hnathawh kal mek te a hmunah kalin a enfiah. Lunglei DC hi DRDA Project Director Pu K. Lalrohlua, BDO Pu David Lalrinawma, DIPRO Pi C. Lalremruati leh thawktu dangten tawiawmin Pukpui, Serkawn, Venglai leh Luangmuala hnathawhna hmun te an tlawh a ni.

Heng hnathawhna hmunah te hian khawtlang hruaitu VC-te leh thawktute nen inkawmhona hun hman niin an hmalak dan tlangpui leh hmachhawpte chipchiar taka sawiho a ni a. Village Council hruaitute chu sawrkar hmalakna hrang hrangah a bulthuta awm, mipui dinhmun hrechiang ber tu leh mipuite ngheng hnai ber tu an nih avangin a ngaih pawimawh takzet thu Lunglei DC chuan a sawi a.MGNREGA hmalakna tha taka kalpui anih chuan mahni veng/khua ah theuh hmasawnna tam tak a thlen thei a ni tiin Lunglei DC chuan VC-te chu an hnathawh tur uluk leh awmze nei taka ruahman thin tur leh mipui hmakhua ngaia thahnemngai taka kalpui turin a chah a ni.

MGNREGA hnuaiah kum 2020- 2021 chhungin Lunglei DRDA hnuaia RD Block pathum - Lunglei, Lungsen leh Bunghmun Block ah ni 100 ah ni 100 inhlawhna neih a ni a, kumin 2021-2022 September thla thleng khan Lunglei ah ni 65, Lungsen ah ni 64 leh Bunghmunah ni 66 inhlawhna neih tawh a ni bawk. Lunglei RD Block hnuaiah tun dinhmunah ni 81 inhlawhna neih tawh a ni.