No.3191/2021-2022
Aizawl, 29th November, 2021 : Commerce & Industries Minister Dr R. Lalthangliana chuan vawiin khan Bamboo Processing Factory a hawng. Bamboo Processing Factory hi Agarbati kuang (Agarbati stick) siamna tur niin Bamboo Development Agency in National Bamboo Mission hnuaia an din a ni.

Commerce & Industries Minister Dr R. Lalthangliana chuan Mizoram-in kan ram economy chawi kang tura kan mamawh ber pakhat chu mau hi a ni a, raw material kan neih that ber pawh mau hi niin sawrkar pawhin a ngai pawimawh hle a ni, a ti a. COVID-19 hripui leng vangin duh angin hma kan la chak thei lova, theihtawp chhuaha a theih an anga tan kan lakna zarah a hlawhtlinna kan hmu ta hi a lawmawm takzet a ni, a ti.

Dr R. Lalthangliana chuan ram pawn atangin mau chi tha kan lakluh rualin tunah hian kan mau neihsa te chhawr tangkaina tur kan han nei thei bawk hi a lawmawm a,mau hi a thang chakin a puitling hma bawk a, kan ram leilung leh sik leh sa mil a nih avangin kan chin uar hi a tul hle a, eizawnna thahnem tak siam chhuak thei a nih avangin tam tham tak kan tharchhuah theuh na tan kan lak a tul a ni, a ti a. Mau bakah hian kan ramah hian tual to, Pathianin tuan leh mang atanga a lo dah sa, tangkai taka hman theih, haichhuah tur tam tak a la awm a, hengte hi kan ngaihven a tul a, kan tharchhuahte hi a hralhna tur ngaihtuah lawk hmasak zel hian awmzie neiin kan economy chawi kanna leh eizawnna ngelnghet siam nan a pawimawh a ni a ti a. technology a thang chak em em a, tunhma a mi tam takin an thawh theih thin kha mi tlemte in hnehsawh takin an thawk thei tawh a, thalai lehkhathiam leh a ngaihna hre zawk ten entrepreneurship lamah kan kal uar a, intodelh tura tan kan lak hi a pawimawh telh telh dawn a ni, a ti bawk.

Dr. K. Pachhunga, MLA, Bamboo Development Board Vice-Chairman ni bawk pawhin thu sawiin hripui leng vanga kan in kharkhip bakah hripui lengin a ken tel harsatna hrang hrang vangin duh angin hma kan la chak thei lova, khawl pawh duh angin kan chah zung zung thei lova, theih tawp kan chhuahna zarah vawiin hun an thleng ta hi a ropui a, industry anga hlawk zawka kan kalpui theihnan mau tha chi kan chin uar a ngai a ni, a ti a. Mau tha chi “Latiflorus” lakluha tissue culture tih tum a nih thu leh hemi atan hian Taiwan lam mithiamte an biak tawh thu sawiin, mau hi kawng chi hrang hrangin a hman tangkai theih a, hmanhmawh taka phelh pheng phunga hmalak chi a ni lova, kan phak ang tawk chin zelah nghet leh rin tlak taka ke kan pen zel a pawimawh a, mau hmanga sumdawnna hi hlawhtlinpui ngei ngei kan tum a ni, a ti.

Bialtu MLA, Pu Zothantluanga pawhin a bial chhunga bamboo processing factory changtlung tak an nei ta chu lawmawm a tih thu sawiin, mipuiten tangkai taka an chhawr ngei a beisei thu leh phurawm a tih thu a sawi a ni.

Dr. Elizabeth Saipari, Mission Director, National Bamboo Mission pawhin mau hman tangkai dan zirchiang tura India ram State hrang hrang leh India ram pawn thlenga an fehchhuah thu sawiin, kum 2019 atang khan Horticulture Department chuan Environment, Forests & Climate Change Department atang bamboo plantation an lak chhawn thu a sawi a. Tunah hian ram hectare 700 chuanga zau ah mau chi tha “Brandisii” leh “Rawmi” an ching mek a, heng bakah hian kan mau neihsa te hman tangkai dan tur an zir zel tih a sawi bawk.

Vawiina hawn tak Bamboo Processing Factory hi National Bamboo Mission atang fund cheng nuai 125 hmanga din niin, Round Agarbatti Stick unit 5 bakah, bamboo charcoal & vinegar kiln leh bamboo seasoning chamber te dah an ni. Heng unit te hian thlakhat-ah round agarbatti stick 25 tonnes (truck trip 2) an siamchhuak thei dawn a ni. Agarbatti stick an siamchhuah zawng zawng te hi India rama Agarbatti siam chhuaktu Company lian ber, N. Ranga Rao & Son te'n man man takin an lei vek zel dawn a ni.

Bamboo Processing Factory hi Zero Waste nitura duan a niin, wastages awm zawng zawng te bamboo charcoal leh bamboo vinegar siam na'n hman an ni ang.

Bamboo Processing Factory hi kum 2020 September thla a sak tan a ni a, Unit tin hi Rs. Nuai 25 man a ni. Unit tinah hian Cross Cutting Machine 5, Manual splitting Machine 9, Slicing Machine 10, Round Stick Making Machine 20, Polishing Machine 6, Stick sizing Machine 5 leh Blade Sharpening Machine 2 a awm a ni. Agarbati kuang siamchhuahte hi 1.3mm diameter a lian niin, a sei zawng hi 8 Inch, 9 Inch, 10 inch leh 12 inch a siam a ni ang. Thla khatah metric ton 25 (khawl pakhat hian ni khatah kg 50 theuh), cheng nuai 25 hu siamchhuah theih beisei a ni. Bamboo Development Agency hian tun dinhmunah Agarbatti sticks Units 9 din tawhin, Bamboo Technology Park, Sairang, Zuangtui Industrial estate, Thingsulthliah leh Darlawng-ahte a din a ni.

Bamboo Processing Factory hawnna inkhawm hi Pu Lalduhpuia Sailo, Dy. General Manager, Bamboo Development Agency chuan kaihhruaiin, Pi Esther Lalruatkimi, Executive Chairman, Bamboo Development Agency leh Pi Florence Zotluangpuii, Executive Director, Bamboo Development Agency te bakah, Commerce & Industries Department Officer te leh Bamboo Development Board memberte leh Bamboo Development Agency official te an tel a ni.