No.3190/2021-2022
Aizawl the 29th, November 2021: Tukin zing dar 7 : 00 Am khan Zoram Drivers Union, Sub Headquarters Lunglei buatsaihin Venglai Traffic Point ah Road Safety Week 2021 chu Pu Rex Zarzoliana Vanchhawng, MPS, Superintendent of Police Lunglei chuan khuallian niin a hawng. Kumin a thupui chu "Fimkhur la Nun chhanhim rawh" tih hman a ni.

November ni 29 atanga December 5, 2021 thleng awh tur Road Safety Week vawi 40-na hawnna inkhawm hi Pu CR. Lalchuailova, Secretary, ZDU, Sub Headquarters, Lungleiin kaihruaiin Pu Rex Zarzoliana Vanchhawng chuan kan himna hi a pawimawh a chumi atan chuan tunge mawhphur tih kan ngaihtuah chian angai a ni tiin, tun ang hun hi a tlangpui in lirthei chetsual tam hun ani fo a, hetiang huna kan himna tura Road Safety Week hman ani hi a lawmawm hle ani a ti. Kan himna atan hian Police te mawhphurhna mai piah lamah hian mitin mai hian tihtur mawhphurhna kan nei a, kawng sira bungrua kan dah duhdan te, Department in license a pek danah te, lirthei khalh danah te keimahni zawn theuhah fimkhur tur leh midangte tan a him em tih ngaihtuahin kawng siamtu te pawh hian kan him tlanna atan mawhphurhna an nei tih hriat a tul ani a ti. SP chuan kum tlinglo lirthei khalh tir fo te hi kan him tlanna atana pawi thei anih mai bakah Nu leh Pa ten kan fate himlo dinhmunah kan dah a ni tih kan hriat a tul ani tiin ZDU in hetiang hun an buatsaih hi tun atan tawp lo sela kan hun lokal zel tur atan kan himna hi i ngaipawimawh zel ang u a ti.

Pu David Lalrinawma, MCS, District Transport Officer, Lunglei chuan kumtin hetiang hun hman a ni thin chu lawmawm a tih thu leh kumtin lirthei khalhtu thar tam tak an awm thin avangin in hrilhhriat thar zel a pawimawh a ni tiin Road Safety Week hlawhtling tak nei turin Transport Department, Police te leh mipui ten thawhhona tha kan neih a pawimawh a ni a ti.

Pu Zairemthanga, President, Zoram Drivers Union, Sub Headquarters, Lunglei pawhin thu sawiin he Road Safety Week hian rah tha a chhuah ngei a beisei a, lirthei khalhtu leh mipui te pawhin Road Safety Week a ni tih hria ila, fimkhurlohna avangin ramtui leilo a awm tam tak an awm tawhin nunna chan tamtak an awm tawh a ni tih hria ila, keimahni ah fimkhurna rilru kan put a ngai a ni tiin mi tam tak ten lirthei khaltu te sawisel thin mahse vawiin thlenga Zoram Drivers Union te hmingchhe lutuk lo a kan awm hi Pathian min hruaina a ni tiin lirthei khalhtu te fimkhurna vawng reng turin a chah a ni.