3145/2023-2024

Aizawl, 21st December, 2023 : DIPR Minister, Aizawl North-II bialtu MLA ni bawk Dr Vanlalthlana chuan tukin khan a MLA fund cheng nuai 8.5 senga sak Ramhlun North YMA "Chawngbawla Run" chung sak zawm (vertical extension) a hawng.

YMA Run a hawnna inkhawm buatsaihah bialtu MLA, Minister ni bawk Dr Vanlalthlana chuan Chawngbawla tuchhuan 5-na a nih thu sawiin an thlahtute hming chawi a in sak tha tak a hawng thei chu vannei a intih thu a sawi a. YMA chu mirethei leh hausa thliar hrang lova chhiatni thatni a veng chhung mipuite tuamhlawmtu an nih avangin an hlu takzet a ni a ti a. Mizo nun zemawi "Tlawmngaihna" vawng nungtu leh thangtharte hnena zirtirtu an nihna hi a zahawmin a chhuanawm tak zet a ni a ti bawk. Tlawmngai pawlte tan mi harsa zawk leh chhuanchham te dawm kan kawngah ruahmanna mumal leh felfai tak siam a ke pen a pawimawh thu a sawi bawk a ni.

Minister hian a bial chhunga thalai te zingah 'entrepreneurship' lama tui an awm chuan a tul ang anga hmalakpui a inhuam thu a sawi a, an khawtlanga zirna in te pawh ngaihven a, a hmasawnna tur ngaihtuaha thawh ho puiah tlawmngai pawl te a sawm bawk a ni.

Chawngbawla Run hi Ramhlun North YMA enkawl a ni a. MLA Fund Rs. 8,50,000/- senga sak a ni a, branch YMA sum Rs. 1,23,322/- an hmang tel a, veng chhung mi leh sa mi thahnemngai tak tak ten hmanrua leh bungraw mamawh thahnem tak an thawh bawk a ni. Chawngbawla Run vertical extension hi ni 92 chhungin sak zawh a ni.

Hawnna inkhawm hi Pu Vanlalruata Ralte, President, Ramhlun North YMA in a kaihhruai a, in sak enkawltu Pu Lalneihhlua, Assistant Secretary, Ramhlun North YMA in report a pe a, tlawmngai pawl hrang hrang aiawh he hun chhimtute hnen atangin thusawi ngaihthlak a ni bawk.