3146/2023-2024

Aizawl, the 21st December, 2023: Public Works Department (PWD) Minister Pu Vanlalhlana chuan tukin khan Tlawng lei dawh that mek leh Lengpui Airport sak that hna kalpui mekte chu a hmunah kalin hmalakna leh hmachhawpte a enfiah.

PWD Minister Pu Vanlalhlana chuan hmasawnna ruhrel pawimawh tak zawh hun tur bituk baka hun pawhsei, Tlawng lei dawh that leh Lengpui Airport sak that hna thawh mekte chu ruahmanna siam anga zawhfel thuai a nih theih nana tan la turin Contractor-te a chah a. Hna tlo leh tha, ram leh hnam tana chhawrnahawm tak siam a nih theih nana theihtawp chhuah turin a chah bawk a. Department aiawha hna viltute pawh hna kalpui mekte uluk taka enzui tur leh harsatna awmte thuneitute hnena thlen thuai thin turin a chah a. Sawrkar kaltlanga in sak leh hmasawnna ruhrel dang siamte chu quality tha leh tlo a ni tur a ni, a ti bawk.

Tlawng lei dawh that mek, Steel Arch (semi through) Bridge hi Sawrkar laipui Ministry of Road Transport & Highways hnuaia thawh a ni a, Mizoram PWD chuan hmalakna a vil a, EPC Mode-in Poddar Infratech Pvt Ltd. ten lei dawh that hna hi an thawk a. Lei dawh thatna atan hian Rs. 36,99,00,009/- (cheng vaibelchhe sawmthum paruk, nuai sawmkua pakua leh chengkua) ruahman a ni a. Kumin October thlaa zawhfel hman tura tih chu pawhsei niin, March 2024 hian zawhfel hman tum a ni. Tun dinhmunah hna za zela 74.25 (74.25%) vel zo fel tawh anga chhut a ni a. India rama Inclined Network Arch Bridge hmasa ber tur niin, 432 MT vela rit a ni dawn a. A sei zawng 100 m, a dung 7.5 m leh a sanna lai berah 17 m a sang ni tura ruahman a ni a. Lei dawh bakah hian a panna kawngpui Aizawl lamah 180 m a thui leh Lengpui lamah 265.300 m a thui siam tum a ni.

Lengpui Airport sak that hna hi Improvement/Upgradation of Operational/ Non Operational Facilities of Lengpui Airport hnuaiah hlawm hniha then a ni a. Renovation of Terminal Building hi SCA/SASCE sum cheng nuai 2764.83 senga thawh niin Contractor hi Zoramchhana a ni a. Elevated Road with Connected components of Terminal Building hi NESIDS sum cheng nuai 1959 senga sak niin Contractor hi Kamlova Chhangte (KR Construction) a ni.

He hunah hian chak zawka hmalak a nih theih nan leh hna kal mekte zawhfel thuai a nih theih nana tulte leh ruahmanna siam zel dan turte ngaihtuah ho a ni a. Heng bakah hian Lengpui Airport Runway cheithat chungchang pawh PWD hotuten Minister hnenah hian an thlen bawk a, Pavement Classification Number (PCN) value chu Thlawhtheihna lian zawk tum theihna turin Directorate General of Civil Aviation (DGCA) bituk anga tihsan a tul thu leh runway pavement-te Falling Weight Deflectometer (FWD) hmanga siamthat chungchang leh tul dangte an thlen a. Minister hovin chipchiar zawka inrawnkhawmna neiha hmalak zel dan tur ngaihtuah ho leh ni se tih a ni.

PWD Minister hi Er. Lalrinkima Hnamte, E-in-C, Er. H. Zoramliana, CE (Highway), Er. Hrangthanga Zote, CE (Buildings & Other Department), Er. David Sapzova, CE (Planning), Pi Lalchhandami, Chief Architect leh Line Department Official dante'n an tawiawm a ni.