3147/2023-2024

Aizawl, the 21st December, 2023: Hunpui Krismas leh Kumthar vuakveta halpuah hal chungchangah Mizoram Pollution Control Board (MPCB) chuan mipuite hnena hriattirna leh ngenna hetiang hian a chhuah:

Halpuah hal hian boruak a tibawlhhlawh a, mihring hriselna lamah nghawng tha lo tak neiin Chuap (lung), Mit (eye) leh Beng (ear) te hi a khawih pawi thei hlê a ni. Hâlpuah ri bengchheng hian mipuiah chi-aina thlenin dam lo leh tar chak lote tân harsatna a thlen nasa bîk a ni. India Dânpui, Article 21-nain mi tinte hrisêlna a humhalh tlat angin tumahin mi dangte hrisêlna khawih pawi zâwnga an khawsak a remti lo a, a bîkin kum upa lam dawrâwm zâwk leh naupangte hrisêlna khawih pawi thei zâwnga chêt phei chu a rem lo lehzual a. Hetiang a nih avâng hian Mizoram sawrkâr pawhin hâlpuah hâl khapna thupêk a chhuah reng a ni.

Mizoram Pollution Control Board-in kum tina a zir chianna a neih thin atanga a lan dânin hâlpuah hâl hian boruak tibawlhhlawh zualin ri bengchheng a siam nasa hlê bawk a. Hetiang a nih avang hian hâlpuah hâl pawizia hre thar leha kan hmâ lawka hunpui lo thleng turah hian hâlpuah hâl lo turin Mizoram Pollution Control Board chuan mipuite a chahin a ngên a ni.