3171/2022-2023

Aizawl, 4th January, 2023 : DIPR Minister Pu Lalruatkima chuan vawiin chawhma dar 10:00 khan Ebenezer hospital, Chawnpui-ah a mamawhte tana hman tur ventilator a hlan a, ventilator hi Formosa Foundation kaltlanga lak a ni.

He hunah hian Formosa Foundation hruaituten Minister hi an tawiawm a, Ebenezer Hospital hotuten lo dawngsawngin hospital conference hall ah hlanna hun hi hman a ni.

Formosa foundation hian Mizoram chhunga hospital hrang hrangah ventilator an hlan tawh a, oxygen concentrator pawh 550 an pe tawh bawk a ni. Heng bakah hian Covid-19 dona atan leh hman atan PPE kit te, mask te, RT-PCR kit te pawh thahnem tak an pe tawh bawk. Covid-19 vanga harsatna tawk chhungkua 14192 tan pawh ration an pe bawk a ni. 

He hunah hian Minister chuan Formosa foundation ten an thil tih zawng zawng ah lawmthu a sawi a, heng hun harsa kan tawn laia NGO dang te pawn an thil tih a ropui a tihzia a sawi a ni. Formosa foundation ten an thil hlan hi Ebenezer Hospital ten mipui rawng an bawlna atana hmanraw tangkai tak a nih ngei a rin thu a sawi.

Formosa Foundation chairman Pu Jonathan Lalremruata chuan he hunah hian technical report a pe a, Ventilator hi Ebenezer Hospital MD Dr Vanlasiama'n a dawng a ni.