3170/2022-2023

Lunglei the 4th January, 2023 – Civil Hospital Lungleia tui bawlhhlawh sawngbawlna khawl bun thar Effluent Treatment Plant chu vawiin chawhma khan Lunglei DC Pu Kulothungan A in a hawng. Effluent Treatment Plant hi Central Warehousing Corporation (CWC) atanga Corporate Social Responsibility (CSR) sum cheng nuai 17.61 senga ruahman a ni. Heti hian Civil Hospital Lunglei chu Mizorama sawrkar hospital zingah Effluent Treatment Plant nei hmasa ber a ni.

Hawnna inkhawm tawi Civil Hospital Conference Hall a neih chu Dr SR Ngurchamliana, Medical Superintendent in a kaihruai a. Lunglei DC Pu Kulothungan A chuan Effluent Treatment Plant (ETP) chu Lunglei District tana ro hlu leh hriselna lama hmasawnna rahbi thar duhawm tak a ni tiin Corporate Social Responsibility (CSR) phal taka rawn pe tu Central Warehousing Corporation (CWC) hotute chungah lawmthu a sawi a. Hmasawnna daih rei kan neih theihna turin zirna leh hriselna lamah tan kan lak chhunzawm zel a tul a ni tiin Lunglei District tan hospital laboratory hmanraw hrang hrang, leh Blood Donation Van te neih belh thuai anih dawn bakah PHC leh Sub Centre te hmasawnna tur pawh hmalakna a kal mek thu a sawi a ni.

Dr Joseph L Chongthu, Orthopaedic Surgeon, CHL chuan Technical Report a pe a. Effluent Treatment Plant hi Central Warehousing Corporation (CWC) atanga Corporate Social Responsibility (CSR) sum cheng nuai 17.61 senga ruahman a ni a. He hna hi EL&TY Constructions, Electric Veng Lunglei ten an thawk a. He khawl hmang hian hospital tui chhia/bawlhhlawh chu zun in, ek in, leh thil dang atana hman leh theihin sawngbawl a ni a. He plant hman anih hnu hian Civil Hospital Lunglei atanga tui chhia te tuikhur leh lui ah te a luang lut tawh dawnlo a ni. Effluent Treatment Plant bun thar hian nitin tui chhia litre 20,000 thleng a sawngbawl thei a ni.

Vawiin program-ah hian Pu K Simon, Warehouse Manager, CWC Lunglei pawhin thu sawina hun hmangin Pu Donny Lalruatsanga, Additional DC Lunglei chuan lawmthu sawina hun a hmang.