No.7101/2020-2021

Vawiin chawhma khan Pu. Hmingthanzuala, District Information & Public Relations Officer, Kolasib hovin Mizoram Journalist Association, Kolasib district member-ten inhlan tharna hun DIPRO Office, Project vengah an hmang a, DIPRO hian MJA member-te hnenah hian Task Group on Documentation, Kolasib hmingin ‘Documentation on Covid-19 Vol-1’ a hlan nghal bawk a ni.

Pu Hmingthanzuala chuan Kolasib district MJA-te chu Covid-19 hrileng dona kawngah Frontline worker pawimawh tak an nih thu sawiin sawrkar leh mipui tan a an inpekna chungah lawmthu a sawi a, a tul apianga sawrkar hmalakna tichak zawnga thawk zel turin a fuih. Hrileng avanga eizawnna hrang hrang dapna kawngah harsatna a thlen mek laiin thutharthehdarh kawng a eizawngte pawhin harsatna an hmachhawn mek a, hetiang karah hian Electronic media kaltlanga journalist hna kalpui nachang hria pawh an pun mek thu sawiin MJA, Kolasib district member-te pawh hemi kawngah hian hma sawn tum zel turin DIPRO chuan a chah bawk a ni.

Pu Andrew VL Auva, Vice President, MJA Kolasib chuan MJA Kolasib district leh DIPRO Office, Kolasib inkar a thawhhona leh inpawhna boruak tha tak a awm thin chu lawmawm a tih thu sawiin ram pum a thutharlakhawmtute pual a hman thin, ‘National Press Day’ pawh Kolasiba hman thin nise a duh thu a sawi bawk a ni.

MJA Kolasib district-ah hian member 15 awm mekin 12-te chu Accredited Journalist an ni a, Prominent Journalist 1 a awm bawk a ni.