No.7100/2020-2021

Vawiin khan Lawngtlai DC Conference Hall-ah Bawrhsap Dr Andrew H. Vanlaldika hovin Lawngtlaia Republic Day 2021 hman dan tur rel a ni a. State sawrkar leh LADC official-te leh pawl hrang hrang ai awhte an tel.

Chairman Dr Andrew H. Vanlaldika chuan COVID-19 hri leng vangin kum dang angin Republic Day chu hman theih a ni dawn lo tih sawiin, state sawrkarina hman dan tur a ruahman dan a sawi fiah a. Ram ni pawimawh a nih ang ngeia khunkhan tak si, COVID-19 laka fimkhurna dan zawm chung sia hman dan ngaihtuah turin kal khawmte chu a sawm a ni.

Meeting chuan kumin Republic Day lawmna hi Central YLA Playground-ah zing dar 8:30-ah hman ni se, tiin a rel a. Kum dang anga sikul naupang atanga parade contingent beisei a rem loh avangin guard of honour atan Mizoram Police Armed Contingent beisei an ni. 

Swachh Bharat Mission hnuaia Lawngtlai District chhunga faina intihsiaknaa lawmmante chu Republic Day lawmnaah hian sem tur a ni a. Lawngtlai khawpui chhunga damdawi in pathum, chhawmdawlna in leh District Jail-ah te Republic Day pual tanpuina thilpek pek leh ni se, tih a ni bawk.

Republic Day lawmna atana thil pawimawh hrang hrang bawhzuia hma la turin Technical Committee din a ni a. Department leh tlawmngai pawlte kovah mawhphurhna hrang hrang nghah a ni bawk. Republic Day lawmnaah hian sawrkarin a ruahman angin sikul naupang leh mipui nawlpui tel lova hun hman a ni dawn a. Mipuiin in lam atanga an lo chhim theih nan cable TV kal tlanga live telecast-a pek chhuah tum a ni.

Republic Day ni-ah hian sawrkar office, zirna in leh sawrkar quarters-ah te hnam puanzar zar vek tura tih a ni a. Kum danga Republic Day lawmna puala tournament buatsaih thin chu COVID-19 boruak avangin buatsaih a rem dawn lo a ni.