DIPR’S UPDATE ON COVID-19 FOR MIZORAM  (11.4.2020 12:00 NOON – 12.4.2020 12:00 NOON)

#CM RELIEF FUND FOR COVID-19 ATANA SUM LUT (11.4.2020, 2:00 P.M)

COVID-19 hripui leng do tura Chief Minister's Relief Fund a sum chhunglut an pung zel a. April ni 11, 2020 chawhnu dar 2 thlenga sum hmuhte chu a hnuai a mi ang hi a ni:
1) Zo Zo Filling Station, Sailam - Rs. 1,00,000
2) Futsal Association of Mizoram - Rs. 10,000
3) Centre for Indian Trade Union- Mizoram - Rs. 5,000
 4) Civil Transport Corps Association (Govt. Porters & Transport Sirdars) FCS&CA - Rs. 5,000

#KOLASIB DC-IN COVID-19 CHUNGCHANG AH PRESS MITE KAWM

April ni 11, 2020 khan Kolasib DC Dr. H. Lalthlangliana, chuan a pisa ah Kolasib District chhung a Covid-19 hri venna hna kalpui dan chungchang ah press mite kawmin hmalakna kal mek leh hmalak chhunzawm dan tur te a sawipui.

Dr H Lalthlangliana chuan Press mite chu mipui te rilru leh ngaihtuahna kaihruaitu pawimawh tak an nih avangin COVID-19 chungchanga mipuite tangkaipui tur thu thehdarh leh mipui ti chi-ai lo zawng a thuziah a pawimawh thu a sawi a. Inkharkhip ngawrh tak a kalpui a nih lai a social media hrang hrang kaltlang a thubelhchiandawllo hmuh tur awm thin chuan mipui a tih chi-ai bakah thawktute a tih hah phah thin thu a sawi bawk a ni. Kolasib DC chuan COVID-19 hri venna kawng a district chhung a hmalakna pawimawh zualte tarlangin - ramri hrul, state dang nen a inkalpawh theihna hmunah te chuan duty tha tak a siam vek a nih thu te, Vairengte leh Bairabi National Highway a Screening gate siamah te motor leh bungrua tih thianghlim (sanitised) zel a nih thu te leh ramri hrul a task force duty te chu ngaih pawimawh bik an nih thu a sawi a. Phalna la lo a ramri kan a lo let, Task force ten enthlak tur a an dah hran mi 50 vel chu Polytechnic, Thingdawl-ah an awmna tur ruahman a nih thu a sawi bawk a ni.

Dr H Lalthlangliana chuan mipui nitin mamawh phur motor te chu Vairengte leh Bairabi screening point ah uluk tak a endik tawh an nih avangin kawng lakah tih khawtlai loh hram ni thin se a duh thu sawiin ei leh bar a harsatna lian zawk a awm loh nan huan leh lo a hnathawk tur te pawh kal tir phal mai a pawimawh thu a sawi bawk. DC chuan ramri hrul a ke a inkalpawh theihna hmun bakah Tlawng lui dung a hmun pawimawh zualah te chuan tlaivar a duty thin a nih thu a sawi a, bialtu MLA Pu K Lalrinliana hmalakna zarah tukin khan Kolasib district chhung a mi harsa zual te hnenah a thlawn a sem tur buhfai bag 400 a thlen thu a sawi bawk a ni.

 

# BIALTU MLA IN LENGTENG CONSTITUENCY CHHUNGA COVID-19 DONA KAWNGA HMALAKNATE ENDIK

Ramri hrula awm Lengteng Constituency chhunga COVID-19 darh zel tur venna kawnga hmalaknate chu bialtu MLA Pu L.Thangmawia’n a hmunah kalin a endik.

Pu L.Thangmawia hi April ni 10, 2020 khan a bial chhung mi leh sa Manipur-a lehkhazira awm mi 8 (mipa 6 leh hmeichhia 2), Manipura an awmna Hostel khar sak an nih avanga hun eng emaw chen tangkhang, mahni ram lam pana ke-a risk la a Mimbung khawdai thleng rawn kal te ngaihven turin a kal a. Mimbung khua a thlenin ramri khauh taka dan chah a nih avangin heng zirlaite hian Mizoram an lo lut thei lo tih leh Mimbung khaw daiah zan khat heng zirlaite hi an lo riak tawh bawk tih a hmunah a hmu a. MLA hian heng mite dinhmun khirh zia a hmuhin sorkar thuneitute hnenah thil awmdan hrilh pahin an tan hian Mizorama lo luh a ngen sak nghal a. Hemi hnu hian sorkar thuneitute remruatna in Mimbung khuaa quarantine na hmun tur a ruahmanah an zavai hian dah an ni ta a ni.

Hemi ni vek hian Pu L.Thangmawia chuan a bial chhunga International border pathum: Mimbung, Hrianghmun leh Teikhanga Police leh VLTF duty te tlawh nghalin Manipur border Khawkawna duty na hmun pawh a tlawh nghal a. Heng border post te khauh taka an lo venhim avangin vengtute hnenah lawmthu a hrilh a. Heng post an venhim that leh that loh hian Mizoram Covid 19 laka a him leh him loh thui tak a hril avangin, tha thlah lova ngawrh taka lo ven chhunzawm turin venhim hna thawktute a ngen nghal bawk a. Duty te hnenah hian Kutkawr (glove), mask leh hand sanitizer te a pe bawk a ni.

April ni 11, 2020 (inrinni) khan a bial chhung khaw hrang hranga VLTF duty te a tlawh kual leh nghal a. VLTF te hnenah hian glove, mask leh hand sanitizer te pe in an khawtlang leh Mizoram him nana rim taka an lo thawh tawhna ah lawmthu a hrilh a. Thahnemngai taka thawk chhunzawm zel turin a ngen nghal bawk a ni. Ngopa khawchhuak Pu F.Kapsanga te chhungkuain buhfai leh chawhmeh thahnem tak VLTF te kaltlanga Ngopa mipuite hnena an pe chu entawn tlak a tih thu a sawi a. "An ni tihdan ang hian neinung zawk ten an pian leh murna khua te tanpui nachang hre ve theuh se, sorkar leh VLTF te phurrit nasa takin a chhawk dawn a ni," a ti.

 Pu L Thangmawia hian a bial chhunga damdawiin hrang hrang ah PPE full set a sem nghal a, Covid 19 vei awm palh thuta damdawiin hrang hrang te dinhmun pawh Medical Officer te a sawipui nghal bawk a. Dulte Village Level Task Force in an khuaa balhhla chhe mai tur MLA kaltlanga hralhsak tura an ngenna anga Aizawl Mission Vengthlang LLTF ten an lo hralhsakna sum Rs 61,500 chu Dulte VLTF te kutah a hlan nghal bawk a ni. Lengteng bial chhung khaw hrang hrang leh border post a tlawh na ah hian Saitual District thuneitute hmalakna a that em avangin lawmthu a sawi a. Heng thuneitute hmalakna a hlawhtlin theih nana rim taka thawktu officer leh staff te, Police te leh VLTF zawng zawng te hnenah lawmthu a sawi a. Hrileng laka kan him tlan theih nan Sawrkar thu leh VLTF te thu tha taka zawm chhunzawm chu thil pawimawh hmasa a ni a ti.

# PRIME MINISTER HOVA STATE TIN CM MEETING NEIH AH LOCKDOWN KALPUI ZEL DUH THU AN THLEN

Covid-19 hripui leng mek avanga India rampuma inkharkhipna kalpui mekah April ni 11, 2020 khan Prime Minister Narendra Modi chuan India rama Chief Minister leh Lt. Governor te chu video conference kaltlangin a kawm a. State hrang hranga hmalak dan te leh kal zel an duh dan te ngaithlain, Prime Minister chuan a tam zawkin inkharkhipna kalpui zel an duh angin - kar hnih chhung dang kalpui turin ruahmanna siam a nih tur thu a sawi.

Mizoram Chief Minister Pu Zoramthanga pawh he video Conference-ah hian telin, Health Minister Dr. R. Lalthangliana, Home Minister Pu Lalchamliana, Chief Secretary, Home Secretary, Health Secretary leh Director General of Police ten an tawiawm a ni.

Prime Minister chuan hrileng avanga ei leh bar lamin nasa taka a tawrh phah chu tiziaawm tur leh, thawktute hriselna ngaihtuah chung zela hmalak ni se tiin state te a chah a. Industry-te chuan an mi rawihte tan an hnathawhna hmunah ei leh in bakah riahhmun buatsaih theih dan te, black market leh bungraw chheprelh a awmloh nana hmalak a pawimawh thu te sawiin, agriculture lam ngaih pawimawh a tul thu a sawi bawk.

 He video conference zawh hian Chief Minister Pu Zoramthanga chuan phalna nei lova ramri kan chungchangah khauh taka ramri ven hna thawk turin Home Department hotute a hrilh a. He natna hrileng do hneh tur chuan mipuite kan zavaia kan tanrual a tul thu a sawi a ni.

#COVID-19 REPORT : H&FW DEPARTMENT (Dt11.4.20205:00 Pm)

# STATUS OF STATE SURVEILLANCE OF COVID-19 DATE: 11.4.2020

 (Time: 10.4.2020 12Noon – 11.4.2020 5:00pm)

Helpline no. 102(toll free), 0389 2323336, 0389 2318336 

# VANTLANG HMUN A CHIL CHHAK KHAP A NI

COVID-19 laka mipui an lo him theih nan April ni 11, 2020 khan Chief Secretary chuan thuchhuah siamin, tumahin vantlang hmunah chil chhak lo turin mipui a hriattir a. He thupek bawhchhia te chu The Mizoram Epidemic Diseases (COVID-19) Regulations, 2020 Section 13 in a sawi angin an chungah hremna lek kawh theih a ni.

# TRANSPORT MINISTER HOVIN STATE PAWN ATANGA MIZORAM MAMAWH PHURHLUH CHUNGCHANGA INRAWNKHAWMNA NEIH A NI

Transport Minister Pu TJ Lalnuntluanga kaihhruaiin April ni 11, 2020 khan State pawn atanga Mizoram chhunga mamawh phurhluh chungchanga inrawnkhawmna neih a ni a. He inrawnkhawmna ah hian Chief Secretary Pu Lalnunmawia Chuaungo bakah Task Group on Transport memberte, Home leh Supply department hotuliante bakah Mizoram Truck Drivers’ Association leh Mizoram Truck Owners’ Association hotute an tel a ni.

Meeting kaihruaitu Transport Minister Pu TJ Lalnuntluanga chuan khawvelin hun khirh tak a tawn lai a nih vangin Mizoram pawh kan bang bik chuang lova, inthlahdah lova theihtawp chhuah a kan fimkhur zual a ngai a ni a ti a. Mizoram mamawh eitur leh bungrua chi hrang hrang kan lakluh reng a la ngaih si avangin hengte hi engtin nge him taka kan kalpui ang tih kan ngaihtuah a ngai a, Mizoram mamawh rawn phurluttu lirthei khalhtu a bik takin truck driver te chu Medical Workers, Police leh Local Task Force te ang bawka ral hmatawnga huaisen leh tawrhchhel taka pen chhuak an ni tih sawiin ram leh hnam tana an inpekna a ngaihsanawm hle a ni tih a sawi a. Mizoram mamawh phur luh kawnga hmalatu pawl hrang hrangte inpekna ah lawmthu a sawi bawk a ni.

Chief Secretary Pu Lalnunmawia Chuaungo pawhin lockdown hi engtikah nge thlahdul a nih anga hlih a nih dawn tih a hriatloh a, tunah hian kan him thawkhat tawh angin inhre mah ila kan chhehvel min hualtute ah COVID-19 hri vei an pun chhoh zel avangin kan fimkhur a ngai em em a, tuna a lan dan chuan State pawn lam atanga rawn lut te atangin kai theihna chance a awm a ni a ti a. Phai lam nen kan inkalpawh lo thei silo a, phai lam atanga bungrua rawn phurh luh a ngai reng si a, phai atanga phurlut tute leh Mizoram atanga phai lama bungrua zuk la an awm reng lo theilo a, hei hi engtin nge him zawkin kan kalpui ang tih ngaihtuah a ngai a, Mizoram mi leh sa lockdown vanga phai lama tangkhang rawn haw turte pawh an la awm a, sawrkarin ruahmanna a siamte thuawih taka mipuiin kan zawm tlan hram hram rih a pawimawh dawn a ni a ti.

 Meetingah hian Transport Department-in Mizorama bungraw phurhluh chungchanga zawm tur inkaihhruaina Standard Operation Procedure (SOP) a ruahman chu uluk taka sawiho niin, Mizoram mamawh phurtu driver leh handyman-te an him theih dan tur chi hrang hrangte sawiho a ni a, heng sawihona eng atang hian sawrkarin SOP mumal takin a duangchhuak dawn a ni.

# DAILY SITUATION REPORT ON COVID-19 QUARANTINE FACILITATION CENTRE  KOLASIB DISTRICT REPORT AS ON 11.04.2020 @5:00Pm

Cumulative No. Inmates Admitted                                                             - 200
Cumulative No. of Inmates Released                                          - 148
Total No. of Suspected Case Referred to Isolation Ward         - 0
Total No of Inmates presently staying in Facilitation Centre    - 52
  

#DAILY SITUATION REPORT ON COVID-19 SCREENING POINT KOLASIB DISTRICT REPORT AS ON 11.04.2020 @05:00pm

Total Vehicles Passed = 128
Total Passengers Screened = 310
Total Home Quarantine = 0
Total Quarantine At Facilitation Centre = 0
Total Suspected Case Referred To Isolation = 0
 

# NITIN MAMAWH CHHEK KHAWL LEH HRALH CHUNGCHANGA SERCHHIP DISTRICT BAWRHSAP HRIATTIRNA

Dr. Lalzirmawia Chhangte, IAS, Serchhip District Bawrhsap chuan nitin mamawh bungrua (essential commodities) hralh leh chhekkhawl chungchanga hriattirna hetiang hian a tichhuak:

Tunlai hian COVID 19 hri leng avangin ni tin mamawh, ei leh bar leh bungraw dang lakluh kawngah harsatna kan tawk mek a. He harsatna denchhen hian sumdawng thenkhattten bungrua hleihluak taka a man tisang an awm tih hriat a ni a. 

Khawtlang leh mipuiten harsatna kan tawh laia harsatna denchhena hleihluak taka hlep tum kan awm hi a pawi takzet a ni. Chuvangin, dawrkai tumahin an lakna aia sang uchuak taka mipuite hnena bungrua hralh chhuak tawh lo tur leh a man awm tawka hralh turin kan inngenin kan inhriattir a ni. 

Tin, bungrua a van huna hlawk zawka hralh beiseina avanga mipui mamawh bungrua (essential commodities) a ruka chhek khawl(hoarding) hi phal loh a ni a, chutiang thil ti lo turin kan inhriattir a. 

Hemi bawhchhia an awm anih chuan a tul angin action lak a ni ang. 

#DISTRICT - DAILY REPORT ON STATUS AT QUARANTINE FACILITY AS ON 11/04/2020

#DISTRICT - DAILY REPORT ON STATUS AT ISOLATION FACILITY AS ON 11/04/2020

# RAMRI DAMDAWI HMANGA KAH THIANGHLIM A NI

April ni 12, 2020 hian Mizoram leh Tripura inrina Langkaih Lei leh Assam nena inrina Medili Lei leh a bul vel chu damdawi Sodium Hypocloride hmanga kah thianghlim a ni.

Tunhnaia Mizoram ramri dep Tripura-ah Covid - 19 vei hmuhchhuah belh a nih tak avangin, ramri ven hna uluk lehzuala kalpui zel a ni dawn a. Dr Vanlalfela, Chief Medical Officer, (CMO) Mamit chuan Kanhmun khua hi April ni 12, 2020 hian tlawhin, Tripura nena inrina Langkaih Lei Gate leh Medili Lei leh a bul vel chu damdawi hmanga kah thianghlim a ni a. Covid- 19 vei palh thulha, Medical Team-te him leh uluk taka chetlak dan turte sawiho nghal a ni bawk.

Kanhmun khawchhung atangin ramri-a duty tur ruihlo leh a kaihhnawiha fihlim leh mi rintlak mi, 120 thlanchhuah niin uluk taka ramri venhimna hi kalpui a ni ang. Ramri depa awm Kanhmun khua chuan Mizoramin he natna kan kai lohna tur hian ramri venhimna kawngah theihtawp an chhuah zela, chhun zan zawmin ngawr taka duty kalpui zel a ni ang.