No.288/2020-2021

Aizawl, 12th April, 2020 : Nimin tlai khan Home Minister Pu Lalchamliana chuan a pisa-ah ramri venhimna kalpui dan (Border Security Management) chungchang Mizoram Police, Assam Rifles, Border Security Force leh Central YMA aiawhte a sawipui.

Ramri ven dan chungchang sawihonaah hian Pu Lalchamliana, Home Minister chuan, tunlaia COVID-19 hripui len laia, Mizoram ramri a duty, Mizoram Police, Border Security Force leh Assam Rifles te chu phalna neilo leh dan lova ramri kan a Mizorama Iuh ruk tumte lakah uluk lehzuala ramri venga duty turin a chah nawn leh a. Chief Minister zahawm tak, Pu Zoramthanga ngenna angin, COVID-19 hripui dona kawngah thawhhona tha tak nen chak zawka ramri venhimna kalpui a nih theih nan, Assam Rifles, Border Security Force, Mizoram Police leh Village Level Task Force te chu ramri an venna hmunah inberawn chung zelin; COVID-19 hripui laka Mizoram mipui kan him theih nan lungrual taka thawkho turin a chah a. Assam Rifles leh BSF te pawh International Border a duty post an neih lohna hmunah pawh a tam thei ang ber temporary duty post siam belh turin a ngen a ni. Mizoram Police pawh; Inter-State leh International Border-ah a tulna lai apianga in dah thar leh indah belh tura hmalak nghal tum a nih thu Home Minister zahawm tak chuan a sawi bawk. Inter-State leh International Border a Police Out-Post zawng zawng leh District hrang hranga Police duty-te chu Senior Police officer te'n vila tlawh thin turin a hriattir a ni. CYMA hruaitute pawh Sub-HQ YMA, Group YMA, Joint YMA leh Branch YMA te tha tichak a tlawmngaih chhuaha a tulna hmun hrang hranga Task Force te nen an mahni area a police duty te pui turin a ngen a ni.

Meeting-ah hian Chief Secretary Mizoram; Secretary, Home Department leh Home Department a senior officer-te, DGP, IGP(L&O); ICP(HQ), DIG (NR), DIG, BSF; GSO-2, Assam Rifles leh CYMA President, Vice President leh General Secretary te an tel a ni.