No.289/2020-2021
Lok Sabha MP Pu C. Lalrosanga chuan lockdown vanga Mizoram mi leh sa Mizoram pawn a tangkhangte a theih ang anga a chhui zui thu a sawi a, a hriat theih chinte chu an awmna state sawrkar hnenah ngenna thlenin anmahni state ṭheuhva Mizoram mi leh sa tangkhangte lo ngaihven tur leh a theih dan ang anga lo tanpui turin a ngen tih a sawi a. Hnam thila inthliarna leh thinhrikna laka tangkhang hote thlavang hauhsak turin state hrang hrang Chief Secretary te pawh lehkha a thawn a ni tih a sawi a, State heang hrang 20 sawrkar a dawr tawh thu a sawi a ni.
New Delhi a awm mek Lok Sabha MP Pu C. Lalrosanga chuan India ramchhunga khawpui hrang hrang 40 velah Mizoram khaw hrang hrang a chengte lockdown puan tirh atang khan an tangkhang tih a sawi a, heng tangkhangte hi zirlaite bakah hna nghet lo thawktu chi hrang hrangte, zin veivakte, damlo leh damlo buaipuitute an ni tlangpui a ti a. Flight cancel thut avanga rawn haw hman ta lo, awmna mumal nei lova Mizoram House a awm tate leh ṭhiante fin tate pawh an awm a ti.
Lockdown vanga Mizoram pawn hmun hrang hranga tangkhangte chuan ei leh in lamah harsatna an tawkin Mizorama haw dan tur an enghelh hle a tih Lok sabha MP hian a sawi a, inluah man chungchangah harsatna an tawh tlangpui bakah hnam inthliarna leh diriamna tawkte pawh an awm a ti a. Ei tur nei mumal tawh lote an ni bawk, a ti.
Phai lama hnathawk tangkhangte hi mimal company, hotel, restaurant, spa leh parlour vela hnathawk, lockdown avanga an hna aṭanga chawlhtir, hlawh la mumal lo leh inluah man pe thei lote leh an in luah aṭanga chhuahtirte an ni tlangpui a ti a, tangkhanghote hi 600 vel chu an tlin a rin thu sawiin, mi 500 chuang an in report tawh a ni, a ti.
