No.3248/2019-2020


1.COVID-19 CHUNGCHANGA MIZORAM DINHMUN (22.3.2020 12:00 Noon-23.3.2020 12:00 Noon)


Sl No

                       Category

Belh thar

Endik tirh atanga vawiin thlenga dinhmun belhkhawm

1

Endik tawh zat

        566              

59496

2

Mahni ina khunghran/home quarantine tawh zat (India ram pawn COVID-19 hri lenna atanga lo haw)

          1

                   180

3

Mahni ina khunghran/home quarantine tura hriattir (India ramchhung, Mizoram pawn State/UT hrang hrang atanga lo haw)

      321

                   2159

4

Damdawi ina khung hran (isolate) tawh zat

         0

                    0

5

COVID-19 test-na atana sample lakkhawm tawh zat

         5

                  16

6

Sample endik atanga positive zat

         0

                   0

7

He natna avanga damdawi ina admit zat

         0

                   0

8

He natna avanga thi zat

         0

                   0

 


2. FCS&CA IN A HNUAIA HNATHAWKTE, RETAILER TE LEH RATION KHULTU MIPUITE ZAWM TURA NGENNA SIAM

 Food, Civil Supplies & Consumer Affairs( FCS & CA) chuan COVID-19 hrileng laka mipui kan himna turin a hnuaia mi ang hian FCS&CA a thawkte, Vengchhunga Buhfai Semtute leh mipui te zawm ngei turin ngenna a siam.


Central Sokar in tunlai hri leng mek COVID-19 chungchanga Advisory a chhuah zulzuiin State Sorkar hnuaia Department hrang hrangte pawhin ruahmanna fel tak kan siam a tul hle a. He hri leng mek COVID-19 laka mipuite kan him theih nan leh abik takin FCS&CA Department hnuaia hnathawktute bakah Retailer zawng zawng leh an hnuaia Ration buhfai la thin te kan lo him zawk theihna turin a hnuaia kaihhruaina hi zawm hram ni thei se.

1. Centre hrang hrang kudam a FCS&CA Staff te'n kudam an luh dawnah kut faitakin an sil thin tur a ni a, mask pawh an vuah ngei tur a ni. Tul tawpkhawk thil a nih loh chuan kudam chhungah pawn lam mi luh tir loh tur a ni. A theih chin chinah Hand Sanitizer pawh hman tur a ni.

2. Godown/kudamah hian truck leh drivers te'n hun tlem thei ang ber hmang tura ruahmanna siam ni se. Centre in charge te leh drivers leh dawrtu te inkarah Metre 1 zel awm thei se. Inchim luai luai leh punkhawmna awm lo turin centre in charge te'n ruahmanna an centre theuhah lo siam se.

3.FCS&CA Dept. Godown' kudam a thawktute lch labourers te inkarah metre khat tal awl siam tur a ni.Chaw, tui leh thil dang inban pawlh loh ni se. Kut sil fai ngun tura tui leh sahbawn chhawp sak hi Centre in charge te mawhphurhna a ni.

4. Kudam area chhungah eng truck/ motor mah zan riah phal a ni lo.

5.Office, kudam, ration semna hmun leh Department building leh a chheh velah mipui awmkhawm tir loh tur a ni a, a huhova inhmuhkhawm /meeting etc. te hi pumpelh tum hram ni se. Mask, gloves leh handkerchief te hi office hnathawk bakah ration la tur te'n hman hram hram ni se.

6. Fair Price Shop dealer/ Retailer te'n ePoS device an khawih dawn in an kut fai takin an sil hmasa tur a ni.

7. Mipui beneficiarics/ration la tur te he hrileng laka an lo him zawk theih na'n Retailer te'n an dawr bul hmun remchangah tui supply, sahbon/ hand sanitizer te hman theih mai turin an chhawpchhuak tur ani.

8.Vawikhata mipui an pun khawm chiam lohna turin leh beneficiaries te'n ration buhfai hun thawl zawka an lak theihna turin buhfai sem hun chhung pawh Retailer-te'n an pawt sei tur a ni.

9. Fair Price Shop dawr chhungah hian ration buhfai la turte chauh luh tir tur a ni. Tin, a dawr chhungah tumkhatah mi pathum aia tam luh tir/ awm tir loh ni se. Ration la turte pawh inhnaih/inngheng lo thei ang berin intlar tur a ni. Chutiang ruahmanna chu Village/Local Council kaihhruaina hnuaiah Retailer te'n an siam tur ani.



3. COVID-19 DAMDAWI CHUNGCHANG

Sawrkar laipui Ministry of Health and Family Welfare chuan thuchhuah siamin mipuite chu COVID-19 damdawi awm ang leh damdawi dawra lei mai theih ni anga thu thang lakah fimkhur turin a chah.  COVID-19 tihdamna tur damdawi bik a awm lo a. Doctor ten uluk taka an vilna hnuaiah leh damloten an duh ngei a ni tih an hriatchian hnuah he natna enkawlna tura damdawi awm ang te hi Hospital thlan bikah chauh hman theih a ni. 

 


4.MCTA IN COVID DO NAN HEALTH MINISTER HNENAH TANPUINA CHENG 1,50,000 HLAN

Vawiin khan Mizoram College Teachers’ Association (MCTA) Headquarters hruaitute te chuan Health Minister Dr. R. Lalthangliana hnenah a Pisa ah COVID-19 dona kawnga Sawrkar hma lakna tih chak nan leh a tul apianga hman atan cheng 1,50,000 chu cheque an hlan. MCTA aiawh hian President Pu Lalbiakzuala, General Secretary Pu Samuel J. Laltlanzauva leh  Treasurer Dr. Samuel Vanlalthlanga ten an hlan a ni.

Health Minister Dr. R. Lalthangliana, Higher & Technical Department changtu ni bawk chuan MCTA in Sawrkar hmalakna tawiawm a Sawrkar hnenah COVID-19 dona tur sumfai an hlan chu lawmthu sawiin a pawl anga hmahruaitu an ni, a ti a, ram leh hnam tana an thahnemngaiha fakawm a tih thu a sawi. COVID-19 in khawvel pum a tibuai avangin zirna in zawng zawng te khar a nih tak hnuah zirlai naupangte in lama home task leh home assignment an pek te chu vil zui a enpui zel turin a chah a ni.

MCTA hian College 24 ah Branch neiin Member 625 a nei mek a ni. 

 


5. HEALTH MINISTER IN ASSAM LEH TRIPURA THUNEITUTE AN RAMRI CHINAH COVID-19 SCREENING TI ULUK TURIN NGEN

Aizawl, 23rd March 2020 : Tunhnaia Health Minister Dr. R Lalthangliana'n Tripura leh Assam ramri a COVID-19 screening kalpui dan a thlithlai naah Tripura leh Assam chuan Mizoram nen an inrinaah COVID-19 screening leh hma lakna an nei manglo chu veiawm a tih thu Tripura Deputy Chief Minister Pu Jishnu Debbarma leh Assam Health Minister Pu Himanta Biswa Sarma te chu hrilhin, heng hmunah te hian ruahmanna siama hma la nghal turin a ngen a ni.

Health Minister Dr. R. Lalthangliana chuan Tripura Deputy Chief Minister Pu Jishnu Debbarma a biak naah Tripura khua Damchherra ah COVID-19 screening buaipuitu Tripura Sawrkar mi leh sa a hmuh loh thu hrilhin, a rang lama helai hmunah hian screening ti turin a ngen a. Zampui tlang dunga Mizo khua 10 chuangah te chuan COVID-19 dona kawngah hma la turin Tripura Sawrkar chu a ngen a ni. Hetiang bawk hian Tripura Health Secretary Pu Debasis Basu leh SDM Kanchanpur Pi Chandni Chandran te pawh a bia a. Helai hmun Assam nena ramri chinah pawh Assam Health Minister Pu Himanta Biswa Sarma chu hma la turin a ngen zui a. Assam Sawrkar Principal Secretary Health Departmentchangtu Pu Samir Sinha chu hma la turin a be zui bawk a ni. 

 

6. LENGPUI AIRPORT-A TUMTE LEH GUWAHATI ATANGA LIRTHEIA LO KALTE KHUNGHRANG DAWN 

Vawiin khan Mizoram Sawrkar Home Department chuan Mizoram mipuite COVID-19 laka kan him theih nan kaihhruaina a tichhuak a. Hei hi vawiin atangin khauh taka kalpui nghal a ni.

 

1.Maharashtra, Kerala, Delhi, Uttar Pradesh, Karnataka, Rajasthan leh Punjab atanga thlawhna hmanga lo haw te chu Lengpui Airport an thlen veleh Sawrkarin quarantine facility a siamah dah nghal tur a ni. 

 

2. Guwahati atanga lirtheia lo kal zawng zawngte chu Kolasib District chhunga sawrkar quarantine facility ah dah tur a ni. Hei hi District Level Task Force ten hma an la ang. 


3.Quarantine facility-a medical mi leh sa awm mek ten uluk takin heng mite hi an endik ang.


4. District Level Task Force ten quarantine facility-a dah zawng zawngte hi an zin veivahna hmun (travel history) zawng  zawng chiang takin an chhinchhiah ang a. Local Level Task Force te nena tanghovin heng mite hi mahni ina inkhunghranna tur hmunhma an nei tha tawk em tih leh khawiah mah ding khawmuang lova an chenna in thlengin chatlak lova kalna tur lirthei an nei em tih te an enfiah tur a ni.

 

5. Mahni ina inkhunghranna tur tha tawk an nei em tih finfiah a nih hnuah chauh sawrkar quarantine facility hi chhuahsan phalsak an ni ang. 

 


7. THUDIKLO VAWRHDARH AN AWM CHUAN PIB HNENAH HRIATTIR THEIH

Novel Coronavirus chungchangah social media platform hrang hrangah thu diklo, belhchhian dawl lo leh mi tiralkhel zawng thil tam tak vawrh darh thin a nih avangin hei hi nuaibo a nih theih nan Sawrkar Laipui chuan mipuite fimkhur turin a chah a. Thudik lo nia rinhlelh vawrhdarh an awm chuan Press Information Bureau +918799711259 ah whatsapp-in emaw pibfactcheck@gmail.com ah thawn tur a ni. 


 

8. SAWRKAR LAIPUIIN MARCH NI 24, 2020 ZANLAI ATANGIN DOMESTIC AIRLINES ZAWNG ZAWNG CHAWLH TIR 

Sawrkar Laipui thuchhuak angin India ramchhunga domestic schedule commercial airlines zawng zawng chu thuleh awm hma chuan March ni 24, 2020 zanlai dar 11:59 PM atangin chawlh vek tur a ni a. Airlines zawng zawngte chuan an thlawhtheihnate March ni 24, 2020 zanlai dar 11:59 PM ral hma in an tumna tura tum fel vek turin ruahmanna an siam tur a ni.


He khuahkhirhna hian bungraw phur thlawhtheihnate a huam tel lo thung. Lengpui Airport erawh chu naktuk zing atangin khar a ni.