1589/2025-2026

Lawngtlai, 25th September. 2025 : Vawiin chawhma khan Food Civil Supplies & Consumer Affairs Department (FCS&CA) hnuaia Retailer- te hnen a Mit naute enna (Iris Scanner) semchhuahna DC Conference Hall, Lawngtlaiah neih a ni a. Pi Saizikpuii, Director, FCS&CA, chuan hmanpuiin semchhuahna a nei.

Pi Saizikpuii chuan Lawngtlai District- ah pawh e-KYC ti tura kutzungpui thla (Finger Print) E-POS Machine- in a hmuhtheihloh engemawzat an awm tih sawrkarin a hria tih sawiin, Mizoram hmundangah pawh engemawzat an awm mek a ni, a ti a. Mizoram pumah tun dinhmunah 'e-KYC' la tifello mi sing hnih chuang an la awm tih tarlangin, EPOS Machine- atanga Kut zungpui thla hmuh theih lohte chu Mit Naute atanga hmuhtheih a nih vangin Sawrkar chuan Retailer -ten an hman tangkai turin Iris Scanner chu a semchhuak tan a ni, a ti.

FCS&CA Director chuan Ram pawna awm tiam lohin, India ramchhunga awmte tan khawi hmunah pawh awm ni se, an hnaih ber Retailer atangin e-KYC hi tih fel theih a nih thu a sawi a. E-KYC- hi ngaihthah a nih chuan mihring awm reng siin, an buhfai dawn tur sawrkarlaipui atangin hmuh theih a nih loh avangin harsatna a thlen thei tiin, Retailer -te chu an huamchhung theuhah 'e-KYC' ngaipawimawh thar turin a chah nghal bawk.

Iris Scanner- semchhuahna inkhawm hi Pu Lianchhuma Chinzah, DCSO Lawngtlai chuan a kaihruai a. Lawngtlai Centre- a Retailer- te chu Iris Scanner hman dan inzirtirna hun neih nghal a ni. Lawngtlai DCSO huamchhungah hian Retailer -139 awmin, vawiin khan Iris Scanner hi Lawngtlai Centre -a Retailer - 35 hnen ah semchhuah a ni a, Retailer dangte chuan DCSO Office atangin 'Iris Scanner' hi an lam leh dawn a ni.