No.783/2021-2022

Lunglei the 2nd June 2021 - Director, Hospital & Medical Education, H&FW Department Dr T Lalhmangaihi chuan vawiin chhun khan Lunglei rawn thlengin Lunglei Civil Hospitala Trauma Centre sak mek, RT-PCR Laboratory buatsaihna hmun tur, H&FW Department quarter sak mekte a enfiah bakah Covid-19 hrileng darh zel chungchanga Lunglei District H&FW Department hnathawktute hmalak mek dan leh mamawh an neih te a rawn enfiah pui a ni. Director hi Dr Gracy Laldinmawii, Assistant Professor Microbiology Department, ZMC in rawn tawiawmin Lungleiah CMO Dr LC Liana, Medical Superintendent Dr SR Ngurchamliana leh H&FW hnathawktu dangten anlo dawngsawng a ni.

Lunglei Civil Hospital-a inspection-te neih zawh fel hnuah Sub Hqrs YMA Conference Hall, Venglai Lungleiah Sub Hqrs YMA Lunglei hruaitute leh media mite nen thutkhawmna hun hman leh a ni. He hunah hian MJA Lunglei President Pu H Lalthansanga leh media mi dangte, Sub Hqrs YMA Lunglei President Pu Lalrotluanga leh a thawpuite an tel a ni. Director, Hospital & Medical Education, H&FW Department Dr T Lalhmangaihi chuan Lunglei chu Mizoram chhim lam District dangte tan pawha hmunpui leh hmun pawimawh anih avangin health lama hmasawnna ruhrel hrang hrang (health infrastructure) lama tih hmasawn chu H&FW Department-in a ngai pawimawh takzet a, Trauma Centre sak mek anih bakah khawl pawimawh tak tak te bun chhoh mek zel niin tih changtlung zel kawngah Department pawhin theihtawp a chhuah chhunzawm zel dawn a ni, a ti a.

Kalkhawmte zawhna chhangin RT-PCR khawl dahna tur hmun him tangkai taka hman theihna tur ‘Laboratory Block' siam tumin hmalak mek a ni. He 'Laboratory Block’ hi Civil Hospital, Lunglei compound chhungah dah turin ruahmanna siam a ni a, cheng vaibelchhe 7.8 man hu Detailed Project Report (DPR) pawh siamin NEC ah a thehlut tawh nghe nghe a ni. He DPR hi NEC ah um zuiin sanction hmuh thuai beisei a ni. DPR ah hian Laboratory building bakah hmanraw chi hrang hrang mamawh tur pawh a tel nghal a ni, a ti. He 'Laboratory Block’ hi peih fel anih hunah Pu Zodintluanga, MLA-in RT-PCR khawl a rawn donate chu laboratory a lakluha, hman tum anih thu a sawi a ni.

Heng zawng zawng hi a puitlin hma chu Truenat Quattro khawl dang (a tul chuan pakhat aia tam) sawrkarin lei belh turin hma a la mek a ni, a ti a. Hemi bakah hian FIND India leh NGO leh company dangte pawh dawr mek niin Corporate Social Responsibility (CSR) kaltlanga Truenat khawl leh mamawh dangte an rawn pek theih an beisei thu a sawi bawk.

Director, Hospital & Medical Education, H&FW Department Dr T Lalhmangaihi te hian vawiin tlai khan Aizawl panin Lunglei an chhuahsan leh nghal a ni.