No.784/2021-2022

Siaha; 2nd June, 2021: Vawiin chawhnu dar 1:00Pm khan Siaha District COVID-19 Food Security Consultative Committee (SDCFSCC) chuan Chairman Dr K. Beichhua hovin DRDA's District Rural Resource Centre, Siaha-ah meeting an nei.

Chairman Dr K. Beichhua chuan COVID-19 hrileng avangin ei leh bara harsatna lo thleng thei laka lo inruahman nan hmanhmawh takin SDCFSC Committee hi Nikum 2020 April thla lai hawl vela din niin, a din tuk atangin hna thawk tanin; tihtur pawimawh Agri & Allied Sector, Animal Husbandry, Fish pond etc..te based line survey lak a ni a. Thlai chi leh thiltul dangte dap khawm zawh hnuah; May thla chawhnu atang khan vawiin ni thleng hian thei tawpin SDCFSCC hian hna a la thawk mek zel a ni. Vawiin meeting-ah hian SDCFSCC din tir atanga vawiin ni thlenga kan hmalak tawhna thlir ho leh kan hmachhawp te khun khan taka sawi ho tura thukhawm kan ni , a ti.

SDCFSCC thil tum lian ber chu Covid-19 avanga ei leh bar harsatna lo thleng thei hmachhawn tura kan inpuahchahna hian Siaha district hi thlak danglam se, hmalam hunah pawh ei leh bara district intodelh leh mahni ke a ding thei nih tir tura kawng kawhhmu leh sialsak hi a ni.

Dr.K.Beichhua chuan committee hmalakna hnuaiah loneitute kaltlangin buh leh thlai-ah chuan Siaha district hi kan intodelh thuai kan beiseia, Covid-19 inkharkhip avang erawh chuan duh angin hna kan la thawk chak thei lo a ni.

Dr K. Beichhua chuan Ministry of Tribal Affairs in COVID-19 hrileng doletna atan Agriculture & Allied Sector-ah project proposal siam tura an hriattir thu sawiin, Agriculture, Horticulture, AH&Vety, Sericulture leh Fisheries lamah Mizoram pum tan Rs nuai 2500 hu project proposal an zuk thehluh tawh thu a sawi bawk.

Member Secretary, Siaha DC Pu Kesavan R, IAS chuan SDCFSCC hmalak tawhna report pein, Siaha district a Buh thar chhuah hi Covid-19 hrileng karah SDCFSCC hmalakna avangin kum dang zawng aiin a tam a ni, tiin, tunah hian SDCFSCC hmalaknain chhungkaw 396 te tan Wet-Rice Cultivation (WRC) leilet hectare 517.6 chu JCB 14 hmangin leh zawh sak tawh a ni a. JCB 14 hnathawh darkar belhkhawm hi avaiin darkar 5842 a ni. Nikum April atanga vawiin thlenga SDCFSCC in a sum hman tawh chu Cheng nuai Rs.111.98/- a ni.

Heng bakah hian Siasi leh Chakhei khuaa leiletah tui lakna siamsak tawh a ni bawk.

SDCFSCC hnuaiah Society dinin, tunah hian subsidised rate in Society 5 chuan leilehna Tractor an dawng tawh a ni. SDCFSCC hnuaiah hian Technical Expert team leh Monitoring team din tawh a ni a, vawiin meetingah hian Fund raising team din belh a ni.

SDCFSCC meeting Zawhah hian Minister chuan Water Bill online Payment PHED, Siaha Division a hman tur a tlangzarh nghal a ni.