Pu H.P. Sharma, Director, SPA(NE) Planning Commission chuan Mizorama Sorkar Flagship Programme; NLUP-a hmalakna enin vawiin khan Serchhip District-a hmalakna hrang hrangte a tlawh kual a, Serchhipa line department hrang hrangt a hotuten en an lo tawiawm a ni.

Aizawl atanga an lo chhoh pahin MIFCO Food Processing Plant, Chhingchhip dai a mi chu a tlawh a, hnathawktu te chu theihtawp chhuah tur leh hlep tam tak an nei thei lo a nih pawhin mahni hlawh tur tal chu deh chhuah ngei tum turin a chah a, an hmanraw dangte leh Cold Storage te pawh thar hun bik nei thlai, Lakhuih leh Sapthei te chauh dah nana hmang lovin Sangha te leh kuthnathawktute dehchhuah chi hrang hrangte dah nana hmang a tun aia chhawr tangkai thiam turin a chah bawk a ni.

Tukthuan ei kham velehah Sericulture Depatment te pangang khawina tur in sak lai a en a, tha thawkhata a hriat thu leh pangang khawi tuten an chhawr tangkai ngei a beisei thu a sawi. Hemi zawh hian NLUP Link Road Kikawn atanga Tuikum panna kawng MGNREGS hmanga an laih chu a tlawh leh bawk. He kawng hi KM 4 a thui niin pawisa nuai sawm senga laih a ni a, NLUP dawngtuten a hlawm a Oil Palm leh Hmunphiah an chinna hmun panna tur kawng a ni a, a tangkai hle dawn a ni.

Pu Sharma chuan NLUP atanga vawk vulh thlangtu Pu Zorammawia, New Serchhip vawk vulhna hmun pawh tlawhin vawk vulh thlangtute tana sawrkar thil ruahman dan chu remchang a tih thu leh hna dang thawk pah chunga lei rem rah theihna khawp ngei tura ruahmanna siam a nih dan chu tha a ti hle a, Serchhip –IV Village Council-in NLUP hma lakna hrang hrang leh Village Council ten a tul apiang atana an hman theih tur, BNRGSK Hall tha tak an sak chu en pahin Hall thar tha tak mai chu sawrkar leh mipuiin tangkai taka an hman a beisei thu a sawi bawk.

Serchhipah hian District Veterinary Office ramah NLUP-a bawng vulh thlangtu te bawnghnute thar chhuah sawngbawlna tur Plant, Vety department te enkawl chu a tlawh leh bawk a; Pu Sharma chuan he khawl leh a enkawltuten hman tangkai an tum dan chu uluk takin a zawt fiah a; mipuite tan tangkai hle a rin thu leh a bik takin kut hna thawktu, bawng vulha ei zawngtute tan a tangkai hle a beisei thu uar takin a sawi bawk a ni.

Director chuan Serchhip Bazara NLUP-a puanthui thlangtu pawh tlawhin tanpuina a dawn dan te, a hman tangkai dan leh a hma thlir te zawtin tih tak zeta bei a dinchhuahpui ngei tura a duhsak thu a hrilh a, hemi zawh hian Zawlpui Phaia Agriculture department enkawl Oil Palm Nursery leh Thenzawla NLUP hmanga puantahna hmunte a tlawh kual leh nghal bawk a ni.

Pu Sharma hi Pu Zorammuana, Secretary, NLUP Implementing Board te, Pu David L. Thangliana, Chief Media Officer, NLUP leh Pu Isak Lalmuanpuia Chuaungo, Research Officer, State Planning Board ten an tawiawm a ni.