Vawiin Thawhtanni chawhma dar 10:30 khan Lal Thanhawla Auditorium, Aizawl-ah Disaster Management leh Mizoram Rural Bank Awareness campaign neih a ni a, Parliamentary Secretary Pu Joseph Lalhimpuia chu khuallian niin he hun hi a hmanpui.

Pu Joseph Lalhimpuia chuan thusawiin zirlai kalkhawmte chu text book piah lamah nitina an hman theih hriat zauna lam te bengkhawn a, General studies lam te uar turin a fuih a. Bawlhhlawh a hmuna paih loh avang te, tuihawk luankawr kan siam that loh avangtein chhiatna a lo thleng fova. Heti lamah hian mipuiten ngaihtuahna kan hman a, chhiatna a thlen hmaa fimkhur a tul hle, a ti a. Aizawl khawpui chawmtu Tlawng lui chu khawpui chhunga kan bawlhhlawh paih tam takin a tibawlhhlawh tih sawiin vengchhung kawrtea bawlhhlawh paih mai te hi tuiin a len zel a, Tlawngah a luang lut zel a, chu chuan nungcha a suat a, tui thianghlim a tibawlhhlawh bawk a ti a. Zirlaite leh thalaiten hengte hi kan vei a ngai hle a ni a ti.

Parliamentary Secretary chuan Mizote hian hnamdangin an neih ve loh tlawmngaihna te, aia upa zahna te chawinunga Mizo zia leh nihna lantir zel turin kalkhawmte a chah a. Zirlaite chu vengchhunga mahni zir puite chauh el lovin, India ram leh khawvel ramdanga thalaite el phak turin a fuih a, thawhrimna hi hlawhtlinna bul a ni tih theihnghilh lo turin a chah bawk.

He Awareness campaign hi Tribal Youth Development & Empowerment Society of Mizoram buatsaih a ni a, zirlai hruaitu thenkhatte leh khawpui chhunga school naupang thenkhat te an tel a ni.