Vawiin chawhma dar 11:00 khan Secretariat Conference Hall, MINECO ah DM&R Minister Pu Lalchamliana hovin tunhnaia Mizoram khawchhak lama lirnghing chungchanga hmalak dan tur ngaihtuah a ni a. EF&CC Minister Pu T.J Lalnuntluanga, Champhai South bialtu MLA ni bawk leh East Tuipui bialtu MLA Pu Ramthanmawia bakah Chief Secretary Pu Lalnunmawia Chuaungo, DGP, Mizoram, State Executive Committee, Mizoram State Disaster Management Authority member-te bakah Disaster Management & Rehabilitation Department, Home Department leh Police officers te an tel. Meeting ah hian Mizoram University leh Pachhunga University College atangin Geology lam mithiam ten tunhnai lirnghing chungchang an zirchianna kalkhawm te hma ah an sawifiah a ni.

Tunhnaia lirnghing in Mizoram khawchhak lam tlangdung vawi tam tak a sawi chet avangin, mipui te an mangan thu sawi a ni a, hei vang hian meeting chuan a tul huna che mai thei turin Dungtlang ah State Disaster Response Force te dah lailawk tha a ti a. Hemi bak ah hian tunhnaia a zirchianna han nei te leh DM&R Department lamin lirnghing chungchanga mipui te hriattur sawihona “Talk Show’ buatsaih nise tih a ni. Champhai District mipui lirnghing tuar mangang leh thlabar te tan psychological clinic MZU mithiam teleh DM&R tangkawpin huaihawt se tih a ni a, anni hian team engemawzat ah inthenin khawchhak tlangdung khaw 30 chuang tlawh a mipuite thlamuan tur leh counselling an mamawhna apianga tanpui turin July ni 9, 2020 hian Aizawl an chhuahsan ang. Disaster Management & Rehabilitation Department chuan chhanchhuahna hmanrua ngai ang ang  lirnghinna hmun lamah chhawp hnaiin mipui ah lirnghing chungchang leh inbuatsaih dan tur zirtirna / awareness tam zawk pe turin hma a la nghal dawn bawk a ni.