No.2786/2020-2021 

Dated Champhai, the 6th July, 2020: Champhai North Assembly Constituency huamchhunga Model Village atana thlan Ngur khuaah vawiin khan Model Village chungchang inhrilhhriatna Champhai district Bawrhsap Pi Maria C.T Zuali hovin  neih a ni.

He hun Ngur Vengsang Community Hall-a neih kaihruaitu Bawrhsap Pi Maria C.T Zuali chuan Ngur khua chu bialtu MLA Dr. ZR Thiamsanga'n Model Village atana puan anih avanga hmalakna hmasa atan  inhrilhhriatna neih anih thu a sawi a. Model Village nih dawn chuan khaw dangte tana hmasawnna, hriselna leh ei bar zawnna lam thlenga entawntlak nih tum a tul thu sawiin, thil tha nei tur chuan theihtawp chhuah angaia,  khaw fai leh mawi,  nelawm leh kawm nuam tak nih kan tum tur ani, a ti bawk.

Bawrhsap chuan  Model Village ni turin hlenchuah tur hrang hrang a awm thu pawh tarlangin, hmasawnna ruhrel- inkalpawhna kawng tha, tui, eng, inbiakpawhna, faina kawnga hmasawnna, ramngaw leh tuihna tha siamte, hriselna lama inenkawlna thate, eizawnna mumal leh ngelnghet siam leh thil dang tam takte a kentel thu a sawi a. Kumin ah Covid-19 vanga hmalak harsa mahse nakum atanga hmalak dan turte engtinnge chak zawka  kan ngaihtuah ang tih relho a pawimawh thu leh  eizawnna leh khawtlang mamawh hmasawnna ruhrelte engtinnge kan siam that ang tih ngaihtuah a tul thu a sawi a. Mizoram khaw dangte entawntlak leh zirtirtu ni thei tura theihtawp chhuah puiah khawtlang mipuite a sawm a ni.

Dr. J.Lalramchhuanga, Senior Specialist, District Hospital Champhai hnen atangin hriselna lam kawnga hmasawn ngaihna leh nun hrisel nei tura tulte ngaihthlak a ni a. Hrisel turin a man pek angaia, mahni theuh hi kan hriselna tura pawimawh ber kan nih avangin kan taksa kum za daih tura siam vawnhim chu kan kutah theuh a innghat a ni, a ti a. Ei leh in insum, zuk leh hmuam laka fihlim, taksa sawizawi leh faina nunpui pawimawhnate sawilangin, hengte hi Model Village ken tel pawimawh tak ani tiin, hriselna chu hnathawh theihna, hlimna leh hausakna a ni, a ti bawk. Ngur khaw mipuite chu Model Village anih angin Vaihlo, zu leh ruihhlo dangte laka fihlima, nun vawg uluka hriselna lam kawng  zawh tum turin a chah a ni.  

Pu George Lalthanngura, DAO Champhai chuan Covid-19 hripui leng chuan  ei leh bar intodelh angaih zia a lantir thu leh  tampui tlak tak takah sum ringawtin awmzia anei lo a, ei leh bar hnianghnar  zawk thar turin  tun aia nasa zawkahm tan lak angai a ni, a ti a. Mipuite chu mahni hmunhma huan, lo leh  remchang apianga hma la a buh leh bal thar tum turin a fuih a. DAO chuan buh leh bal dahrei theih tharchhuah kawngah  tanlak angaih thu pawh sawiin,  mahni eikhawp tal thar chhuak tura tanlak a ngai a, hripui vangin intodelh tumna rilru put phah ila a lawmawm hle ang, a ti bawk. Ngur khua chu FOCUS kaltlanga Champhai district-a Alu chin chhinna khuate zinga mi anih thu leh enchhinna hmanga a that duh thu leh Coffee leh thlai dangte pawh zirchiana hmalak zel tum anih thu a sawi bawk.

Champhai BDO Pi R.Lalnunkimi pawhin thusawiin, Ngur chu khawtlang inlungrual leh tangho tak an nih angin Model Village pawh hlawhtling taka kalpui anih a beisei thu a sawi a. Hruaitute chu  khawtlang huapa hmasawnna ngaipawimawha rorel thiam tura fuihin,  Model Village a hmuna kalchilha inhrilhhriatna leh inrawnkhawmna buatsaihtu Bawrhsap chungah bialtu BDO leh khaw mite aiawhin lawmthu a sawi bawk a ni.

He hunah hian Official-te, khawtlang hruaitu VC, NGO aiawh leh kuthnathawktu te'n khawtlang mamawh leh tulte sawiin inrawnkhawmna hun an nei a. Ngur  VCP Pu LH Sawngpauva'n lawmthu sawiin hun a khar a ni.

Ngur khua hi kumin January Ni 29, 2020 khan Bialtu MLA Dr. Z.R Thiamsanga, Vice Chairman, Health & Family Welfare Board chuan Model Village atan a puang a. Champhai RD Block huamchhunga awm niin, tun dinhmunah hian chenna In 343  vel bawrah ah  mi 2187  dawn an cheng mek a ni.