1630/2024-2025

Dated Lawngtlai, 16th August  2024: Tukin zing khan  Pu K. Sapdanga, Home Minister, leh  Disaster Management & Rehabilitation changtu nibawk chuan Lawngtlai -III leh Electric Veng lei tlahniam (Sinking Area), Kaladan Multi-Modal Transit Transport Project (KMMTTP) kawng  leimin leh Lawngtlai Chamdmary- a  Recreational Centre sakna tur hmun hma chu a hmunah kalin a tlawh a.  Dr. Lorrain Lalpekliana Chinzah, Lawngtlai East bialtu MLA leh Adviser to Chief Minister (Health & Family Welfare ) nibawk bakah  Sawrkar Official ten an tawiawm a ni.

Pu K. Sapdanga hi Lawngtlai-III leh Electric veng khawtlang hruaituten an lo dawngsawng a. Lawngtlai-III leh Electric Veng a lei tlahniam (Sinking Area) hi kum 1995 aṭanga inṭan tawh niin, kum 2019 hnu khan a che zui ta rih lo va. Kum 2023 fur khaw cheng atanga rawn che nawn lehin, tun dinhmunah hian a che nasa hle a, chhungkaw 23 lai hmun him zawkah sawn niin chenna in thiah takte pawh a awm a ni. He lai lei tlahniam hian a huam zau hle a,  Geology & Mining leh MZU lam atang pawhin zirchianna an lo nei tawh bawk a. Khawtlang hruaitute hian 'Concept Note' an buatsaih chu Minister hnenah hlanin chak zawk a hmalak sak rurin an ngen a . Pu K. Sapdanga, DM&R Minister chuan lei tlahniam vanga harsatna tawk leh  chenna in chan tate a tawrhpui thu a sawi a. Khawtlang hruaituten a 'Concept Note ' an buatsaih pawh chiang zawka zir a,  a theih ang anga hmalak leh bawhzui a tum thu a sawi.

Disaster Management & Rehabilitation  Minister hian Kaladan Multi-Modal Transit Transport Project (KMMTTP) kawng leimin in a tihchhiat chu a hmunah kalin a en nghal a, PWD hotuten an lo dawngsawng a ni.  Leimin hi fur ruahtui tlak tam vang bakah a chhak lama kawng laitu NHIDCL te leivung paih danah an fimkhur tawk loh vang ni an hriat thu Minsiter hi an lo hrilh a . MPWD bakah Deputy Commissioner, Lawngtlai te pawhin NHIDCL hnenah an lei vung paih danah fimkhur turin vawi tam an ngen tawh tih an sawi bawk. Pu K. Sapdanga chuan kawngpui tha nei turin sawrkarin theihtawp a chhuah a, chu tih  rualin hnathawktuten tha  taka hna an thawh tul hle a, leivung paih danah phei chuan fimkhur a ngai hle a ti. KMMTTP kawngin a chhak lama NH- 54 kawng laih vanga harsatna a tawk thin chu thil tha lo tak a ni tiin, NHIDC te hian dan engemaw bawhchhiat an nei ngei nia a lan thu sawiin  NHIDCL  hotute lo sawi pui a tum thu a sawi a. KMMTTP kawngpui tlang loh vanga harsatna tam tak  tawk an awm thin chu thin chu pawi a tih thu sawiin, chak zawka hmalak zel a tum thu a sawi.

Pu K. Sapdanga, Home Minister leh Urban Development & Poverty Alleviation (UD&PA)  Minister nibawk chuan Lawngtlai Chandmary thlanmuan bula 'Chandmary Recreational Centre' sak tura ruahman chu a hmunah  a tlawh nghal a, khawtlang hruaiten an lo dawngsawng a ni. Khawtlang hruaitute hian  Sawrkarin DPR a siam tawh chu sum leh pai sen tura tih  a tlem deuh ni a anhriat thu leh a tul anga lo bawhzui sak turin  Minister hi an lo ngen a. Minister chuan a tul dan ang a hmalak leh enzui ngai ang te pawh enzui a tum thu a hrilh a ni.