No.1995/2021-2022

Aizawl the 25th August 2021: Vawiin khan Pu C.Lalrosanga, MP, Lok Sabha kaihhruaina hnuaiah District Development Coordination & Monitoring Committee ( DISHA), Kolasib district chuan DRDA Conference Hall, Project Veng, Kolasibah thutkhawmna an nei a. Pu Lalrinsanga Ralte, MLA, Serlui, Dr.H.Lalthlangliana, Deputy Commissioner leh Kolasib district chhunga sawrkar laipui ruahmanna a hmasawnna hna kalpuitu Department 9-a hotute an tel a ni.

Pu C.Lalrosanga, MP, Lok Sabha chuan DISHA kaltlanga Kolasib district chhunga hmasawnna hna thlirletna hun buatsaih a ni chu lawmawm a tih thu sawiin he thutkhawmna hnuaiah hian Kolasib district chhunga khaw hrang hrangah hmasawnna inkhairual kalpuina chak zawk a awm ngei a beisei thu a sawi a. DISHA chu sawrkar laipui scheme leh program kalpui tawhna hlawhtlingte hlawhtlin chhan leh hlawhtling ve lote harsatna bih chian a hma thar lak dan tur ruahmanna siam hona hun tangkai tak a nih ngei a beisei thu Pu C.Lalrosanga chuan a sawi bawk a ni. Lok Sabha MP chuan ramri hrul a khua awmte tih hmasawn chu Kolasib district-a Department hrang hrang hotute kutah thui tak a innghah thu tarlangin inpekna thuk tak nen thahnemngai tak a an mawhphurnate hlen chhuak ngei tum a thawk turin kalkhawmte a fuih bawk a ni. PMGSY hnuai a hmalakna thenkhat zawh hun bi tuk chhunga zawh hman loh tam tak awm chu Sawrkar laipui ngaimawh a tlin thu Pu C.Lalrosanga chuan tarlangin hemi kawnga mawhphurtu Department-te chuan hma chak lehzuala la turin a chah bawk a ni.

Pu Lalrinsanga Ralte, Serlui bialtu MLA chuan sawrkar ruahmanna tih hlawhtlin kawnga kutke ber, district-a sawrkar hnathawkte inpekna a pawimawh thu sawiin hmasawnna rualkhai awm theih nan Kolasib district chhunga UD&PA notified town-a hmasawnna hna kalpui dan leh mihring awm dan a zira MGNREGS hnuaia hna kalpui dan pawh uluk tak a ennawn tula a hriat thu a sawi a. Kolasib district-a zirna kawnga hmasawnna a awm theih nan Sawrkar enkawl school-te chu zirlai naupang leh an nu leh pate tan pawh a luh tir chakawm tur khawp a zirtirna kalpui thiam turin thawktute a chah.

District Development Coordination & Monitoring Committee, Kolasib district thutkhawmnaah hian District Office 12 atangin 2020-21 chhunga hna an kalpui dan thlirletna hun neih a ni a. DRDA, BDO Thingdawl, BDO Bilkhawthlir, District Urban Development Office, PWD Kolasib Division, PHED, CMO, DMS, P&E Department, District Education Office, District Civil Supplies Office leh Land Revenue & Settlement Office-a hotuten an hnathawh dan an tarlang a ni.

Vawiin DISHA thutkhawm a tarlan danin Kolasib district-ah MGNREGS hnuaia inziaklut mi 19,697 te hnenah kum 2020-21 chhung atan ni 100 inhlawhna pek a nih thu leh hna 1,567 zawh fel a nih thu ngaihthlak a ni a. DRDA leh department hrang hrang thawhhona hnuaiah kuthnathawktute, ran vulhtute leh loneitute tihhmasawn hna kalpui thin niin eizawnna kawnga hmeichhiate tihhmasawn nan Thingdawl RD Block ah SHG 40 leh Bilkhawthlir RD Block ah 55 thar din a nih thu tarlan a ni bawk. PWD Kolasib division hnuaia PMGSY kaltlanga kawng siam thenkhat hunbi tuk chhung a zo hman lo te endik dan tur leh hma lak chhunzawm dan turte, PHED hnuaia khaw hrang hranga hmalakna hna kalpui dan te enho a ni bawk a ni. Hriselna kawnga Chief Medical Office leh District Hospital kaltlanga hmalakna hrang hrang tarlan zingah kum 2020-21 chhung khan Malaria vanga thi an awm loh thu leh Covid-19 vaccine 1st dose 79.9% pek chhuah a nih tawh thu sawi a ni a. Major Surgery tum 285 leh Minor surgery tum 486 neih a nih thu sawi a ni bawk.