No.1996/2021-2022

Aizawl the 25th August, 2021 : Vawiin khan Lawngtlai District Level Task Force on COVID-19-in a lo rel tawh angin, Additional Deputy Commissioner Pi Marilyn Rualzakhumthangi hovin official-te'n Lawngtlai khawpui chhunga vantlang enkawl COVID-19 positive-te enkawlna, Community Covid Care Centre (4C) ruahman sa hrang hrang tlawhin, a dang ruahman belh theih dan tur an thlir ho.

Additional DC hi Chief Medical Officer Dr LP Malsawma leh Nodal Officer (Quarantine Centre & Executive Duty) Pu R. Lalbiakthanga te'n an tawiawm a. Lawngtlai khawpui chhung veng pali (4)-a 4C buatsaih sate tlawh kualin, an dinhmun leh mamawh an neihte an thlirpui a. Additional DC chuan 4C buatsaiha kalpui mek vengte inpekna fakin, 4C chu Village Level Task Force (VLTF) leh vantlang tang rualin an enkawl ni mah se, mamawh leh harsatna an neih chu District thuneitute hnenah inthlahrung lova thlen zel turin a chah a ni.

Tun dinhmunah Lawngtlai khawpui chhunga veng pali (4) - Chawnhu, College Veng, Lawngtlai Vengpui leh AOC Veng te'n 4C ruahman sa an nei tawh a. Chawnhu VLTF hian Govt Chawnhu M/S-ah 4C ruahmanin, tunah COVID-19 positive enkawl lai mi 4 an awm mek a. College Veng VLTF hian hmeichhe tan BCM College Veng Kohhran Hall leh mipa tan LIKBK Zion SS Hall te 4C-ah ruahmanin, COVID-19 positive enkawl lai pakhat ve ve an awm mek a. Lawngtlai Vengpui VLTF-in 4C atana an buatsaih Govt Southern Public High School leh AOC Veng VLTF-in an buatsaih, UPC (NEI) SS Hall te chu hman mai theiha ruahman fel sa ni mah se, COVID-19 positive dah luh erawh an la awm rih lo thung.

Lawngtlai khawpuiah COVID-19 positive zatin kiam lam a pan hleih theih loh avang leh Covid Care Centre (CCC) awm sain a zo lo lam a nih tawh avangin, 4C mamawhna hi a sang tawh hle a. Official-te hian 4C la buatsaih lohna vengah te pawh buatsaih a nih theih nana hma lak zel dan tur an thlir ho nghal bawk a ni.