2501/2024-2025

Aizawl dated 11th October 2024: Vawiin khan Irrigation & Water Resources Department Auditorium, MINECO-ah Mizoram Agricultural Marketing Board bultumin Mizoram chhung a district hrang hrang a, District Agricultural Marketing Committee-te tan ‘Bana Kaih Scheme 2024 Sensitization cum Consultation Meeting’ neih a ni a.  Prof. Lalnilawma, Minister, Horticulture Department leh Pu PC Vanlalruata, Minister, Agriculture & Farmers Welfare Department-ten an telpui a, Pi Ramdinliani, Special Secretary & Member Secretary, Mizoram Agricultural Marketing Board-in hun a kaihruai a ni.

Horticulture Minister Prof. Lalnilawma chuan Horticulture department chuan Mizoram district hrang hranga sawhthing hmun neitute harsatna phuhruk nan ‘Operation Ginger’ hlawhtling tak a kalpui a nih thu tarlangin, hmun hrang hranga hmalakna kalpuina ah za zel ah 70.45 hlawhtlinna hmuh a nih thu a sawi. Prof. Lalnilawma chuan, theihna leh thiamna nei, mizo thalaite khai chhuahna tur, Bana Kaih Scheme 2024 tihlawhtling ngei turin kalkhawmte a chah a, phurrit a ngai lovin, ram hmasawnna tur a mawhphurhna pawimawh tak a ngai turin a chah bawk a ni. 

Pu PC Vanlalruata, Minister, Agriculture & Farmers Welfare Department chuan ‘Bana Kaih scheme 2024’ chu loneituten an sum hmuh tur hre sa a hma an lak theihna tur a duan a nih thu sawiin an hnathawh rah dik tak an seng theihna tur a ruahman a nih thu a sawi. Kuthnathawktuten eizawnna ngelnghet an neih theihna tur leh lo hmun nghet an neih theihna turin ruahmanna siam a nih thu a sawi bawk a ni. 

Dr. KC Lalmalsawmzauva, Adviser to Chief Minister (Bana kaih scheme) chuan Bana kaih scheme portal kaltlanga Progress Partner-ni tur a dilna 1003 a luh tawh thu leh hmalak an tumna semso chu Cheng vbc. 182.11 a tlin tawh thu a tarlang a. Heng dilna zingah hian Commerce & Industries Department hnuai ah dilna 425 a lut a, Animal Husbandry & Veterinary Department hnuai ah dilna 304 a lut a ni. Dr. KC Lalmalsawmzauva chuan ‘Bana kaih scheme 2024’ chu kuthnathawktute leh a dawrtute inkarah inrintawkna siam leh leilung hausakna tichhe lo zawng a hmalakna  kalpui tur a duan a nih thu a sawi.

Vawiin ‘Sensitization-cum-Consultation meeting on Thlai Thar Market under Handholding scheme 2024’ neihna ah hian Pu Lalmalsawma Pachuau, Secretary, Planning & Programme Implementation Department chuan ‘Bana kaih scheme 2024’ kalpui dan tur sawi fiahna hun a hmang a. Mizoramin hmasawnna tluantling, ‘Sustainable Development Goals’ a neih theih nana ruahmanna a nih thu a tarlang a ni.

Meeting-ah hian District hrang hrang a Deputy Commissioner, District Rural Development Officer, District Veterinary & Animal Husbandry Officer, Distraict Agriculture Officer, District Horticulture Officer, District Commerce & Industries Officer, District Civil Supply Officer, District Cooperative Officer leh District Soil Conservation Officer-te an tel a ni.