2500/2024-2025

AIZAWL; the 11th October, 2024: Vawiin chawhnu dar 1:30Pm khan UD&PA Department huaihawtin Vaivakawn YMA Auditorium Cum Cultural Centre-ah Aizawl Faina Hmathlir (Comprehensive Plan for Municipal Waste in Aizawl) sawihona hun hman a ni a. Pu K.Sapdanga, Hon'ble UD&PA Minister  leh Pu Lalrinenga Sailo, Aizawl Mayor te chuan khuallian leh khualzahawm niin hun a hmanpui.

Sawihona tan hmain a khuhhawnna thu sawiin, Pu Sapdanga chuan  Mizo te hian Fai hi kan tlin a, ka rilru pawhin a duh a ni. Chu chu Biate leh Ngopa te en i la a lang mai a ni. Amaherawh chu Fai turin kan rilru  kan excercise tawk lo a ni. Fai tur chuan  kan rilru a fai hmasak a  phawt a ngai a ni. Kan rilru a fai chuan kan in leh lo, kan kawtthler leh kan tui luan kawr te pawh a lo fai mai dawn a ni.

Kumhlui thlahna leh kumthar hmuahna  te hi, kan boruak  tithianghlim lo zawng khera hman kan duh thin a, a pawi hle mai.Fai tur hian kan inngenin kan inzirtir chhunzawm zel ang, chuti rual chuan khauh takin  Law and Order hmangin kan kawtthler, in leh a bul vel, kan tui luankawr etc.leh kan boruak te kan ti fai tawh dawn a ni.

Halpuah leh halmawi Mizoram chhunga lakluhna motor neitu leh driver chungah kan khauh viau ang. Chutiang halpuah leh halmawi Mizoram chhunga  lakluhna kawnga Sawrkar hnathawk  inhnamhnawih an awm phei chuan an service thlengin a tuar ang.Ram changkang leh fai kan ti te hi Dan leh Hrai lekkawhna kawngah an lo kalna em em a ni.Singapore Faina chhan pawh Dan khauh taka an lekkawh vang a ni a, Fine City( inchawi tirna khawpui) an lo tih hial reng a ni.

Tun hma chuan khawlaiah bawlhhlawh kan hmu chuan YMA rilruah a lang a,AMC awm chinah chuan AMC a lang thin. Tunah chuan khawlaiah bawlhhlawh kan hmuh chuan mahni in enchiang i la, zahna chang I hre tawh ang u, a ti. 

Pu Sapdanga chuan Aizawl khawpui tui luankawr zawng zawng khuhfai vek a, awmze nei taka kan tuichhia te chu tui luankawr té (small) zawk a luan khawm tir a, tuiluankawr té zawk te  chu a lian zawkah fin tir leh a,felfai taka khawpui pawn lama luankhawm tir tum a ni. Heng tui luankawr khuhna chungah hian a remchanna piangah ke leh motor kal theihna tur kawng/step siam tum a ni a, hemi tan hian sum tam tak mamawh a ni a. Kan Department official ten an buaipui mek a ni, a ti bawk. Pu Sapdanga chuan Aizawl khawpui chu khawpui nghet leh fai a nih theih nan mitinin mahni hmazawn theuhah hma i la ang u, tiin kalkhawm te a sawm.

Khualzahawm Pu Lalrinenga Sailo pawhin thu sawiin, Foreign a kan kalin an faina dán kan zawm thain,kan Fai thei viau si a, engah nge kan ram chhungah kan fai theih loh bik? a bal sa tibal belchhatu ni lovin, kei tal hian ka han tifai a nge, ti rilru mitin hian nghet takin pu vek i la, fai turin tumruh bawk i la, kan fai lohna chhan tur a awm lo, a ti. Pu Lalrinenga chuan AMC a lo din atang hian YMA pawh hian Faina lam pang hi a papek deuh ta nge?  Nidanga Faina hnatlang regular taka an neih thin ang kha an nei tawh meuh lo  nih pawhin a lang, tiin  YMA chu theitawp chhuaha  faina kawnga sawrkar  tawiawm chhunzawm zel turin a ngen bawk a ni.

Vawiin hun hmanah hian Mithiam thlanchhuah ten a hnuaia thupui hrang hrang hmang hian AIZAWL FAINA HMATHLIR kalpui dan tur power point present an en tir a.Thupui thlachhuah leh a presenter te chu:

1.Faina kawnga AMC hmalakna Pu Laltlanzova Khiangte, Exe.Corporator I/C Sanitation

2.Faina chungchanga Save the Riparian hmalakna---Pu Romalsawma (Roma Hmar), Save the Riparian 

3.Comprehensive Plan for Municipal Waste Management in Aizawl----Pu Lalmalsawma Pachuau,  Secretary, UD&PA 

4.Solid Waste Management Rules, 2016---Pi Lalhruaitluangi,   Deputy Director, UD&PA Dept. 

5.Waste Segregation leh House-to-House Campaign---Pu Lalremruata Kullai, JMC, AMC 

6.Bawlhhlawh tawih thei trial run chungchang--- Pu V.Lalruatliana, Dy. CEO, ASCL 

7.Street Sweeping mumal zawka kalpui dan tur---Pu PC Lalmalsawma, SO, UD&PA Dept.

8.Mizoram Pollution Control Board leh Solid Waste Management---Pu C. Lalduhawma, Member Secretary, MPCB 

9.Sanitation leh Local Council te hmalakna----Pu Malsawma, President, Aizawl City Local Council Association.

Power Point Presentation hmanga zirtirna neih a ni zawhah Zawhna leh chhanna/Sawihona hun Pu Joseph H. Lalramsanga, Municipal Commissioner,AMC kaihhruaina hnuaiah neih a ni a. Mipui lam atanga zawhna awm te chu UD&PA leh AMC official ten an chhang hlawm a ni.

Vawiin kalkhawm te chuan a hnuaia RESOLUTION hi an pass nghal bawk a ni.

Vawiin dt.11.10.2024 hian Minister, UD&PA Department; AMC Mayor leh Corporator-te; UD&PA, AMC, ASCL hnuaia official-te; Aizawl khawpui chhunga Local Council leh Local Sanitation Committee aiawh kalkhawmte chuan Aizawl khawpui faina chungchanga hmathlira hun kan nei a: Aizawl khawpui hi India rama khawpui fai ber kan nih theih nana ruahmanna Comprehensive Plan for Municipal Waste Management in Aizawl' hi tha kan ti a, kan pawm a ni. Tin, heta hmachhawp hrang hrangte tihlawhtling tur hian kan theihna zawn theuhah theih tawp kan chhuah ang. He ruahmanna tihlawhtling tur hian Aizawl mipui zawng zawng, Kohhran, NGO leh pawl hrang hrangte thawhpuiah kan sawm a ni.

AIZAWL FAINA HMATHLIR SAWIHONA programme hi Pu Lalmalsawma Pachuau, Secretary to the GoM, UD&PA Department in kaihruaiin, Commissioner Pu Lalkiamlova'n hunserh a hmang a. Vawiin programme-ah hian Aizawl Munical Council Mayor,Deputy Mayor leh Corporator-te, UD&PA Dept. leh Aizawl Smart  City Ltd. hnuaia official te, Aizawl  khawpui chhunga Local Council leh Aizawl City Local Council Association aiawh te, Sanitation committee aiawh te leh sawmbik te an tel a ni.

Pi Zarzokimi Jt.Secretary, UD& PA in lawmthu sawiin vawiin programme hi a titawp ta a ni.