1364/2023-2025

Vawiin khan District and Sessions Judge, Aizawl Judicial District, Pu Vanlalenmawia chuan Serchhip a tlawh a. Thuneitute nen meeting chhawng hnih neiin chawhnu lamah Serchhip District Court leh Serchhip District Jail te a enfiah bawk a ni.

Meeting hmasa zawkah hian The Mizoram Victims of Crime Compensation (Amendment) Scheme, 2016 in a sawi anga chhawmdawlna diltu case 10 chungchang ngaihtuah a ni a. Hemi chungchang ngaihtuahtu Committee ah hian District and Sessions Judge Pu Vanlalenmawia chu Chairman a ni a, Serchhip District Legal Services Authority Member Secretary ni lai Pi Josangzeli Tlau chu Secretary a ni a, member ah hian Serchhip DC, Serchhip SP, tlawmngai pawl hrang hrang MHIP, MUP, YMA leh Serchhip District Consumers Union President te chu member an ni.  

District and Sessions Judge Pu Vanlalenmawia chuan The Mizoram Victims of Crime Compensation (Amendment) Scheme, 2016 sawifiahin he dan hnuaia chhawmdawlna dawn theih dan te, pawihkhawihna thlen ni atanga chhiara chhawmdawlna dil theih hun chhung te, chhawmdawlna sum leh pai dawn theih zat te a tarlang a. He danin a tum ber chu mi tupawh misual kut tawrh avanga ram tui leilova an awmin emaw thihna an tawhin an chhungte hnenah chhawmdawlna pek a ni a, he ruahmannna hian pawngsual tuar te pawh a huam a ni, a ti. Vawiin meeting hian danin a sawi anga chhawmdawlna diltu mi 3 (POCSO hnuaiah 2, IPC Section 304A hnuaiah 1) te dilna chu a pawm sak a,  7 dangte erawh chu judgment a la chhuah loh avangin ngaihtuah that leh tur a ni. 

Under Trial Review Committee chu District and Sessions Judge Pu Vanlalenmawia kaihhruaina hnuaiah neih chhunzawm nghal a ni a. Serchhip DC, Serchhip SP, tlawmngai pawl hrang hrang Serchhip District Consumers Union, MHIP, MUP leh YMA President te bakah District Jail Superintendent chu member a ni. He Committee hian bailable case ni si, bail loh vanga jail a tang engzat nge awm tih te; charge sheet thehluh hun tawh, hun bithliaha thehluh hman loh avanga jail tan hun tur aia rei tang an awm em tih leh engzat nge chutiang mi chu awm tih te an thlir ho a. Serchhip District ah hian an chungthu rel mek (under trial prisoners) 40, mipa 34 leh hmeichhia 6 an awm a; court in thiam loh a chantir (convict) mi 25 an awm a ni. 

Aizawl, Kolasib, Serchhip, Mamit leh Saitual District bialtu District and Sessions Judge Pu Vanlalenmawia hian Serchhip District Court a enfiah bakah Judicial Officers Quarters leh Serchhip District Jail, Chhiahtlang chu a hmunah a tlawh a. Chief Judicial Magistrate Pu R.Malsawmdawngzuala,  Civil Judge cum JMFC Serchhip Pi Josangzeli Tlau, Civil Judge cum JMFC Aizawl Pu HT Lalmawizuala leh mi pawimawh dang ten an tawiawm a ni.